Ռուսաստանում վարորդներն արդեն 3-րդ օրն են անցկացնում խցանման մեջ

Ռուսաստանում Մոսկվա-Սանկտ Պետերբուրգ Россия ավտոմայրուղու վրա հսկայական խցանում է գոյացել առատ տեղացած ձյան պատճառով: Վարորդները ստիպված են արդեն 3-րդ օրը մնալ այդ խցանման մեջ: Նրանք հերքում են ԱԻՆ-ի տարածած տեղեկություններն այն մասին, թե ճանապարհային երթևեկությունը վերականգնվել է, և հաղորդում են, որ խցանումը հասնում է մինչև 100 կմ:

Կիրակի օրը փրկարարական ծառայությունների ներկայացուցիչները հայտնել էին, թե Россия դաշնային մայրուղու երթևեկությունը վերականգնվել է, սակայն 2 օր այդ խցանման մեջ մնացած վարորդները հերքել են այդ հայտարարությունը:

Չորեքշաբթի օրը տեղացած առատ ձյան պատճառով Ռուսաստանում երթևեկությունը կաթվածահար էր եղել: Հատկապես անմխիթար էր իրավիճակը Մոսկվա-Սանկտ Պետերբուրգ ավտոմայրուղու վրա, ուր վարորդները ստիպված են եղել 2 օր մնալ 40 կմ խցանման մեջ, նախքան կժամանեն արտակարգ ծառայությունները:

Փրկարարները հայտնում են, որ տեղում կազմակերպվել է վարորդներին սննդի և տաքացուցիչների մատակարարումը, սակայն վարորդները բողոքում են, որ ինքնուրույն հնարավոր չէ հասնել մինչև ԱԻՆ-ի փրկարար կետեր:

«Չկա ոչինչ, ո՛չ սնունդ, ՛ոչ ջուր, ո՛չ վառելիք»,-Русская служба новостей-ին տված հարցազրույցի ժամանակ հաղորդել է վարորդներից մեկը: