Հարավային Կորեան 200 մլն դոլարի մարդասիրական օգնություն կտրամադրի Ուկրաինային

Հարավային Կորեան այս տարի 200 միլիոն դոլարի չափով մարդասիրական օգնություն կհատկացնի Ուկրաինային՝ խոստացված 2,3 միլիարդ դոլարի օգնության փաթեթի շրջանակներում: 

Այս մասին հաղորդում է Yonhap գործակալությունը՝ վկայակոչելով երկրի ֆինանսների նախարարին։

Նախարարն այս մասին հայտարարել է Վաշինգտոնում Ուկրաինայի հարցով անցկացված քննարկման ժամանակ։

Հարավային Կորեայի կառավարությունը պլանավորում է այս տարի նախնական 200 միլիոն դոլար հատկացնել հումանիտար օգնության տեսքով՝ Ուկրաինայի անհետաձգելի կարիքները հոգալու համար, իսկ մնացած 2,1 միլիարդ դոլարը 2025 թվականից կտրամադրվի երկարաժամկետ փոխառությունների տեսքով` ցածր տոկոսադրույքով` Տնտեսական զարգացման համագործակցության հիմնադրամի (EDCF) միջոցով:

Նշվում է, որ Հարավային Կորեան նաև 50-ական մլն դոլար կնվիրաբերի Համաշխարհային բանկին և Վերակառուցման ու զարգացման եվրոպական բանկին՝ Ուկրաինային օգնություն ցուցաբերելու նրանց նախագծերի համար։

Հարավային Կորեայի նախագահ Յուն Սոկ Յոլը 2023 թ. սեպտեմբերին Նյու Դելիում G20-ի գագաթնաժողովի ժամանակ խոստացել էր 2,3 միլիարդ դոլարի չափով լրացուցիչ օգնություն տրամադրել Ուկրաինային։