Փաշինյանն անցել է շանտաժի լեզվի

Վերջերս Հանրային Հեռուստաալիքի եթերում կարելի է տեսնել բլոգերների, հասարակական գործիչների և այսպես ասած՝ խոսող գլուխների, որոնք ուշագրավ թեզ են շրջանառում: Ըստ նրանց՝ Հայաստանում արցախցիները հանդիպում են ունենում ընդդիմության տարբեր շրջանակների հետ: Ըստ նրանց՝ այդ ակտիվությունը վտանգ է ներկայացնում ՀՀ–ի համար, թե ինչ բնույթի և որտեղից բխող վտանգ՝ նրանք, իհարկե, չեն կարող բացատրել:

Օրեր առաջ էլ կառավարության նիստի ընթացքում վարչապետ Նիկոլ Փաշինյանն էր զայրացած հայտարարում, որ օրինական գործողություններ կձեռնարկվեն բոլոր նրանց դեմ, որոնք խոսում են Արցախի վտարանդի կառավարության մասին: Առանց որևէ փաստարկի, Փաշինյանը մեղադրեց Արցախի ղեկավարներին՝ Հայաստանի ազգային անվտանգության համար սպառնալիք ստեղծելու մեջ։ Չհասկանալով «վտարանդի կառավարություն» եզրույթի իմաստը՝ Փաշինյանն ասաց, որ Հայաստանում կա միայն մեկ կառավարություն և չի կարող լինել երկրորդ կառավարություն, չնայած ոչ ոք չէր խոսում երկրորդ կառավարության ստեղծման մասին: Եթե Փաշինյանն ունենար որևէ փորձառու խորհրդական, ապա նրան կտեղեկացներ, որ շատ երկրներում գոյություն ունեն տասնյակ «վտարանդի կառավարություններ», որոնք ամենուրեք ընդունված են միջազգային իրավունքի համաձայն:

Ստացվում է, որ իշխանությունը և նրա սատելիտները շանտաժի են ենթարկում արցախցիներին՝ ամեն կերպ փորձելով վերջիններիս հետ պահել քաղաքական ակտիվությունից, որում վտանգ են տեսնում առաջին հերթին սեփական աթոռի, և այնուհետև՝ Ադրբեջանի հետ «խաղաղության դարաշրջան» բացելու համար: Բայց մյուս կողմից էլ Փաշինյանն ու թիմը արցախցիներին պահում են ֆինանսական կախվածության մեջ՝ խոստանալով նաև ավելացնել տրամադրվող օգնությունը, այդ թվում՝ Արևմուտքից ստացվող դրամաշնորհների օգնությամբ:

Իրականում բարդ է ասել, անշուշտ, թե ով է ավելի մեծ վտանգ ներկայացնում ՀՀ–ի համար: Ընդամենը հիշեցնենք, որ Նիկոլ Փաշինյանը ոչ միայն չի պաշտպանել արցախահայերի իրավունքները, որոնք Հայաստանի քաղաքացիներ են, այլև թույլ է տվել Ադրբեջանի զինված ուժերին հատել Հայաստանի սահմանները 2021 և 2022 թվականներին: