Արևմուտքի՝ «մտրակի ու բլիթի» քաղաքականությունը Փաշինյանի հանդեպ

«Հայաստանում 2023-ին Ժողովրդավարական կառավարման վարկանիշը նվազել է՝ 2.50 ից հասնելով 2.25-ի՝ Կառավարության կողմից ուժի կոնսոլիդացիայի, կենտրոնական իշխանությունների կողմից ընդդիմադիր քաղաքապետերին պաշտոնանկ անելու՝ արդեն մի քանի տարի շարունակվող միտումների, և իշխող կուսակցության ֆինանսական միջոցների թափանցիկության պակասի պատճառով», - հայտարարում է հեղինակավոր Freedom House-ը՝ անցումային երկրների մասին նախօրեին հրապարակած զեկույցում։

Զեկույցում նշվում է, որ Երևանի ավագանու ընտրություններին նախորդված ընտրարշավի ընթացքում տեղական դիտորդները և անկախ լրատվամիջոցները գրանցել են վարչական ռեսուրսի լայնածավալ չարաշահման դեպքեր՝ հոգուտ իշխող կուսակցության։ Որպես օրինակ նշվում է մանկավարժների ու հանրային ծառայողների կազմակերպված մասնակցությունը «Քաղաքացիական պայմանագրի» հանրահավաքներին և տեղական բյուջեների աննախադեպ ծախսը տոնական միջոցառումների վրա, որոնց մասնակցել են իշխող կուսակցության թեկնածուները։

«Ընդամենը մի քանի օր առաջ էլ մեկ այլ զեկույց էր հրապարակվել, որում նշվում էր, որ 2023-ը մտահոգիչ միտումներ ի ցույց դրեց. Infocom-ի ու CivilNet-ի անկախ հետաքննությունները քաղաքական կոռուպցիայի լուրջ նշաններ բացահայտեցին», - նշում է Freedom House-ը` մանրամասնելով. - «Քաղաքացիական պայմանագրի» ընտրարշավի համար գումար փոխանցած մարդկանց մեծ մասը տեղյակ չէին իրենց անունից արված նվիրատվություններից կամ նվիրաբերել էր իր ստացած եկամտից ավելին։

Սակայն, նույն «Freedom House» իրավապաշտպան կազմակերպությունը հրապարակել է իր տարեկան՝ «Nations in Transit 2024» զեկույցը, ուր զուգահեռներ է անցկացրել Ռուսաստանի կողմից Ուկրաինայի դեմ ագրեսիայի ու Ադրբեջանի կողմից Լեռնային Ղարաբաղի դեմ հարձակման միջև՝ վերջինս որակավորելով «էթնիկ զտումներ»:  Ըստ այդ զեկույցի՝ Արցախի հայաթափման մեջ մեղավոր էր ավտորիտար Ալիևը, Պուտինը, այն, որ Արցախի պաշտպանական համակարգը փլուզվեց, անմեղ էր միայն Փաշինյանը: 

Չմոռանանք հիշատակել, որ Freedom House-ը գտնվում է ԱՄՆ Պետդեպի անմիջական հսկողության ներքո և ֆինանսավորվում է այս կառույցի կողմից: Հետևաբար կազմակերպության զեկույցներում արտահայտված գնահատականները չեն կարող պարզապես պատահականություն լինել: Ըստ էության, նման զեկույցների միջոցով Արևմուտքը և մասնավորապես՝ ԱՄՆ-ն, Փաշինյանի դեմ կիրառում է բլիթի և մտրակի քաղաքականությունը, որպեսզի դրդի վերջինիս առավել ակտիվ քայլերի: Իսկ այդ քայլերը, ինչպես գիտենք, կայանում են Երևանի կողմից հակառուսական հռետորաբանությունը գործնական հարթություն տեղափոխելու մեջ: Իսկ այն, որ նման զեկույցները թափվում են Փաշինյանի գլխին անձրևի պես, միայն մի բան կարող է նշանակել՝ Արևմուտքը շտապում է և շտապեցնում է նաև ՀՀ ղեկավարությանը: