2002-2011 թթ.-ին ՀՀ բնակչությունն ավելացել է 126,000-ով

2011թ.-ին արձանագրվել են 44,190 ծնունդներ, որից 423-ը կազմել են բազմապտուղ, նրանցից` 414-ը` երկվորյակ, 9-ը` եռյակ: Ծնվածների ընդհանուր թվաքանակից` 43,340-ը կազմել են կենդանի ծնվածներ, իսկ 850-ը` մեռելածիններ: Նախորդ տարվա համեմատ կենդանի ծնվածների բացարձակ թվաքանակը նվազել է 3.3%-ով, իսկ ծնելիության ընդհանուր գործակիցը, որը բնութագրում է հաշվետու ժամանակաշրջանում կենդանի ծնվածների թվաքանակը 1,000 բնակչի հաշվով, կազմել է 13.3$, որը նախորդող տարվա արձանագրված ցուցանիշի համեմատ նվազել է 0.5 պրոմիլային կետով:

Ծնելիության մակարդակի փոփոխությունն իր ազդեցությունն է թողել նաև կանանց ծնելիության տարիքային գործակիցների վրա, ինչպես տարիքային առանձին խմբերում, այնպես էլ ամբողջապես վերցված ծնունակ տարիքում: 2011թ. 20-24 տարեկանները և, որոշակիորեն ավելի պակաս չափով, 25-29 տարեկանները շարունակում են հանդիսանալ ՀՀ առավել պտղաբեր տարիքային խմբերը, որոնց բաժին է ընկել ծնվածների, համապատասխանաբար, 42.1%-ը և 32.1%-ը:

2011թ. ծնելիության գումարային գործակիցը (երեխաների այն քանակը, որը կծնեն 15-49 տարեկան 1000 կանայք, ծնելիության տվյալ մակարդակի պահպանման դեպքում) կազմել է 1 499 երեխա, բնակչության պարզ վերարտադրության համար անհրաժեշտ 2,150 երեխայի դիմաց: Ընդ որում, 2011թ. քաղաքային բնակչության ծնելիության գումարային գործակիցը կազմել է 1,510, իսկ գյուղականինը` 1 450 երեխա:

Մոր միջին տարիքը երեխայի ծննդյան ժամանակ, 2011թ. կազմել է 25.3 տարեկան, իսկ առաջին երեխայի ծննդյան ժամանակ` 23.5 տարեկանը:

Հարկ է նշել, որ 2011թ. ըստ ծննդի հաջորդականության` երրորդ և հաջորդող կարգի ծնունդների մասնաբաժինը կազմել է ընդամենը կենդանածինների 15.3%-ը, քաղաքներում` 12.8% և գյուղական վայրերում` 19.6 %:

2011թ. ՀՀ-ում արձանագրվել է 27,963 մահվան դեպք, իսկ մահացության ընդհանուր գործակիցը` 1,000 բնակչի հաշվով, ինչպես և 2010թ., կազմել է 8.6 %: 2011թ. ընդամենը մահվան դեպքերից 14,618-ը, կամ 52.3 %-ը կազմել են տղամարդիկ, իսկ 13,345-ը, կամ 47.7%-ը` կանայք:

Տղամարդկանց և կանանց մահացության տարբեր մակարդակներով պայմանավորված, տարբեր են նաև տղամարդկանց և կանանց կյանքի սպասվող միջին տևողության ցուցանիշները: 2011թ.-ին կյանքի սպասվող միջին տևողությունը տղամարդկանց համար կազմել է 70.7 տարի, իսկ կանանց համար` 77.5 տարի: Քաղաքային բնակչության կազմում այդ ցուցանիշը տղամարդկանց համար կազմել է 70.6, կանանց համար` 77.5 տարի, իսկ գյուղական բնակչության համար, համապատասխանաբար, 70.8 և 77.3 տարի:

Ինչպես և նախորդող տարիներին, 2011թ. ևս մահացության կառուցվածքում գերակշռել են արյան շրջանառության համակարգի հետ կապված հիվանդություններից (47.6%) և չարորակ նորագոյացություններից (19.9%) մահվան դեպքերը: Ընդ որում, 2011թ.-ին, 2010թ. համեմատ, մահացության դեպքերն ավելացել են նորագոյացություններից, դժբախտ պատահարներից, թունավորումներից, վնասվածքներից և այլ հիվանդություններից:

2011թ. հանրապետությունում մանկական մահացության գործակիցը (կյանքի առաջին տարում), 1,000 կենդանի ծնվածի հաշվով, կազմել է 11.6‰:

Հանրապետությունում արձանագրված բնակչության բնական հավելաճի ցուցանիշը 2011թ. կազմել է` 15,377 մարդ, իսկ բնական հավելաճի ընդհանուր գործակիցը, 1,000 բնակչի հաշվով, 4.7 պրոմիլ:

2002-2011թթ.-ին հանրապետության բնակչության թվաքանակի ցուցանիշն ի հաշիվ բնական հավելաճի ավելացել է 126.0 հազ. մարդով, որից 77.7 հազ. մարդու աճը կամ բնական հավելաճի 61.7%` արձանագրվել է քաղաքային բնակչության թվաքանակի ցուցանիշում: