Ադրբեջանցիները մեղք չունե՞ն. ի՞նչ վիճակ է Սոթքի հանքում

Սոթքի հանքավայրի շահագործման եղանակի փոփոխության հիմքում տեխնիկա-տնտեսական բաղադրիչն է։ Նման հայտարարություն է արել ՏԿԵ նախարարի տեղակալ Հովհաննես Հարությունյանը։ 

Ըստ նրա՝ հանքավայրը ստորգետնյա եղանակով շահագործելու որոշումը հաստատել է հատուկ հանձնաժողովը:

«Հանքերը բաց կամ ստորգետնյա եղանակով շահագործելու նպատակահարմարությունը կախված է տեխնիկա-տնտեսական հիմնավորումից՝ նրանից, թե որ եղանակով է ավելի շահավետ շահագործել: Այս դեպքում տնտեսապես հիմնավորվել է ստորգետնյա շահագործման անցնելու նպատակահարմարությունը, ինչը հաստատվել է հանձնաժողովի կողմից: Չի կարելի դա կապել քաղաքական, աշխարհաքաղաքական պատճառների հետ, որովհետև կան բնամասեր, որոնք ավելի մոտ են գտնվում երկրի մակերևույթին և դրանք ավելի հարմար է շահագործել բաց հանքի ձևով, իսկ ավելի խորը բնամասերի դեպքում արդյունավետ է ստորգետնյա եղանակը»,- ասել է նա։

Գեղամասար համայնքի նախկին ղեկավար Հակոբ Ավետյանը ծիծաղով է արձագանքում այս հայտարարությանը։ Նա MediaHub-ի հետ զրույցում հիշեցնում է՝ երբ հանքավայրը անցավ շահագործման այս եղանակին։

«Հիմա ուզում են ասել՝ ադրբեջանցիների գալուց հետո չի՞ այս ամենը։ Ապահով էր ամեն ինչ, բայց որոշեցին փակ հանքը շահագործե՞լ»,- հարց հնչեցրեց Ավետյանը։

Նա նշեց, որ աշխատակիցների թիվը կրկնակի նվազել է, գնացքներն էլ նույն տեմպերով չեն աշխատում, ինչ նախկինում։

«Պարզ է, չէ՞, որ հանքը նախկինի կես չափով է աշխատում։ Շատ լավ փոխնախարար ունենք, շատ լուրջ հիմնավորումներ է տալիս»,- նշեց Ավետյանը։

Հիշեցնենք, որ Սոթքի հանքի ստորգետնյա եղանակով արդյունահանման մեկնարկը տրվել է այս տարվա մարտին։ 

Նշենք, որ 2023 թվականի ապրիլի 14-ից սկսած ադրբեջանական զինուժի կողմից պարբերաբար կրակահերթեր էին իրականացվում Սոթքի հանքավայրի ուղղությամբ։ Մայիսի 12-ին ՀՀ տարածքային կառավարման և ենթակառուցվածքների նախարարի տեղակալ Հովհաննես Հարությունյանը հայտնել էր, որ Սոթքում բաց հանքի շահագործումը շուտով կդադարեցվի, բայց որպես պատճառ նշել էր պաշարների սպառումը։ Հանք շահագործող «ԳեոՊրոմայնինգ» ընկերությունը մայիսի 30-ին պաշտոնապես հայտարարեց Ադրբեջանի պարբերական հրետակոծությունների պատճառով Սոթքի հանքավայրում բաց հանքի աշխատանքը դադարեցնելու որոշման մասին։