The Washington Post. «Պուտինը չի մնալու իր պաշտոնում մինչ իր պաշտոնավարման ավարտը». Գ.Կասպարով

Գարի Կասպարովը հարցազրույց է տվել ամերիկյան The Washington Post թերթին, որտեղ անդրադարձել է բազմաթիվ հարցերի:

Գարի Կասպարովը անշուշտ մեր ժամանակների մեծագույն շախմատի չեմպիոնն է, բայց այս օրերին նա իր ռազմավարական մտածողությունը կենտրոնացրել է ոչ թե խաղատախտակի, այլ Ռուսաստանի ընդդիմադիր շարժման ապագան կերտելու վրա՝ հանդես գալով նախագահ Վլադիմիր Պուտինի իշխանության դեմ, գրում է The Washington Post-ը:

Գրեթե 20 տարի կրելով շախմատի աշխարհի չեմպիոնի տիտղոսը և մի անգամ էլ մրցելով IBM «Deep Blue» համակարգչի հետ՝ 2000թ.-ին նա հեռացավ ասպարեզից և իր ուշադրությունը կենտրոնացրեց Պուտինի դեմ պայքարի վրա: Նա փորձեց առաջադրվել որպես նախագահի թեկնածու 2007թ.-ին, բայց անկարող էր մրցել, որովհետև Կրեմլը արգելափակեց նրա մանդատի ներկայացումը: Այդ օրվանից ի վեր նա մասնակցել է ընդդիմության մի շարք հանրահավաքների և ավելի վաղ այս տարվա մեջ ձերբակալվել է ռուսական «Pussy Riot» պանկ խմբի դատի բողոքի ցույցի ժամանակ:

Գարի Կասպարովը ամերիկյան թերթին տված հարցազրույցում Օլգա Խազանի հարցին, թե կարծես դադարել են մեկ տարի առաջ սկսված ցույցերը, նշել է, որ «ցույցերը չեն ավարտվել, դրանք կարող են տևական ազդեցություն ունենալ»:

Աշխարհի չեմպիոնն ընդծել է, որ տվյալ պահին «հիմքը և ակտիվիստները 10 անգամ ավելի շատ են, քան նախկինում: Տեղի է ունեցել հասարակական կարծիքի էական փոփոխություն: Պուտինն այլևս հույսի նախագահը չէ»:

«Այսօր Պուտինի ժողովրդականությունը, եթե դուք կարող եք օգտագործել այդ բառը, նվազում է, և նույնիսկ Կրեմլի ղեկավարած հարցումները ցույց են տալիս, որ Պուտինի կողմնակիցները մինչև հիմա սատարում են նրան իներցիայով: Մարդիկ վախենում են փոփոխությունից, և դժվար է նրանց մեղադրել: 1991 թվականը այն տարին չէ, որ իմ մրցակիցները ցանկանում են հիշել: Ռուսաստանում քաղաքական փոփոխությունը բերում է բացասական ծագումնաբանական հիշողություն»,-ասել է Կասպարովը:

«Ընդդիմության նպատակն է կառուցել ապագայի պատկերը: Մեզ հարկավոր է ոչ թե համակվել այն մտքով, թե «ով է փոխարինելու» Պուտինին, այլ՝ «ինչն է փոխարինելու» Պուտինին: Մեզ հարկավոր չէ վատ ցարին փոխարինել լավ ցարով»,-ընդծել է Գարի Կասպարովը:

Աշխարհի 13-րդ չեմպիոնը կանխատեսել է, որ Պուտինը չի մնալու իր պաշտոնում մինչ իր պաշտոնավարման ավարտը, այն է՝ 6 տարի:

Իսկ ահա այն հարցին, թե ինչ կլինի հետո, Կասպարովը նշել է. «Չենք կարող իմանալ վստահորեն: Կա ևս մի հանգամանք, որ Վաշինգտոնում  «Մագնիտսկու ակտը» հավանաբար կանցնի: Ժամանակն է, որ պետությունների դեմ պատժամիջոցները փոխարինենք անհատների դեմ պատժամիջոցներով: Ցանկացած իմաստալից արտաքին քաղաքականություն այսօր պետք է ունենա անհատական տեսանկյուն»:

Խոսելով ընդդիմության ծրագրերի կառուցվածքի մասին՝ Կասպարովը նշել է, որ հարկավոր է օրենքի գերակայություն, վստահելի ինստիտուտներ, որոնք կարող են պայքարել կաշառակերության դեմ: Ընդդիմության նպատակն է ապահովել անցումի իրականացումը որքան հնարավոր է խաղաղ կերպով՝ հնարավորինս քիչ չափերի վնաս պատճառելով:

Անդրադառնալով «Pussy Riot»-ի գործին՝ նա նշել է, որ այն դարձավ վարչակարգի դեմ սոցիալական ըմբոստության խորհրդանիշը:

Պաշտպանության նախարար Սերդյուկովի հեռացումի մասին խոսելիս Կասպարովը ասել է, որ վարչակարգի անկայունությունը ստիպում է խմբերին իրար վրա հարձակվել:

Վերջում աշխարհի չեմպիոնն ավելացրել է.«Մենք չենք պայքարում ընտրություններում հաղթանակի համար, մենք դեռևս պայքարում ենք դրանք ունենալու համար, և դա է հիմնական տարբերությունը»: