1991թ. «Մերսեդես»–ի «միջոցով» գյուղապետը յուրացրել է 15.8 մլն դրամ

«Հետք» ինտերնետային կայքի՝ դեկտեմբերի 4-ին՝ «Բացահայտվում են Հայկազ Քոչինյանի կատարած ապօրինությունները» խորագրով տարածված հոդվածի հիման վրա Լոռու մարզի դատախազի որոշմամբ հարուցվել է քրեական գործ՝ պաշտոնեական լիազորությունները չարաշահելու եւ առանձնապես խոշոր չափերով յուրացում կատարելու դեպքի առթիվ։

Հրապարակման համաձայն՝ Հ. Քոչինյանը, ով 1996 թվականից մինչեւ 2012 թվականի նոյեմբերն աշխատել է Լոռու մարզի Շնող համայնքի ղեկավար, հանդիսանալով պաշտոնատար անձ, 2007 թվականին իր պաշտոնեական դիրքը ծառայության շահերին հակառակ օգտագործելով, իր որդուց շուկայականից զգալի ավել արժեքով՝ 4.900.000 դրամ գումարով, գնել է 1991 թվականի արտադրության «Մերսեդես-Բենց S-5» մակնիշի անսարք ավտոմեքենա, որը մինչեւ 2012 թվականը չի շահագործվել ու անսարք վիճակում կայանված է եղել գյուղապետարանի վարչական շենքի բակում:

Նույն ժամանակահատվածում համայնքի ղեկավարը հիշյալ ավտոմեքենայի առուվաճառքի գործարքի, գազալիցքավորման ու վերանորոգման համար համայնքի բյուջեից ելքագրել է առանձնապես խոշոր չափի՝ 10.900.000 դրամ, եւ յուրացման եղանակով հափշտակել:

Բացի այդ, 2010 թվականին նախկինում գյուղապետարանին պատկանող, սակայն հաշվառումից դուրս մնացած 1989 թվականի արտադրության «T 70G» մակնիշի անսարք տրակտորը ձեւակերպել է համագյուղացու անվամբ, որից հետո նույն թվականի ապրիլ 26-ին համայնքի կարիքների համար 3.740.000 ՀՀ դրամով գնել այն:

Ըստ հոդվածի՝ 2010 թվականի հունվարի 20-ին շուկայականից զգալի ավել արժեքով՝ 4.260.000 ՀՀ դրամ գումարով, գյուղապետարանի կարիքների համար ձեռք է բերվել «Վազ 21.21» մակնիշի ավտոմեքենա:

ՀՀ կառավարության որոշման համաձայն գյուղացիներին հողի մշակության գործում աջակցելու համար 2012 թվականի ապրիլի 2-ին գյուղապետարանը «Ֆլեշ» ՍՊ ընկերությունից 2.800.000 դրամով ձեռք է բերել 8.000 լիտր դիզելային վառելանյութ, որը, սակայն, գյուղացիներին չի հատկացվել:

Նկատի ունենալով, որ հրապարակման մեջ առկա են հանցագործության հատկանիշներ՝ հարուցվել է քրեական գործ՝ ՀՀ քրեական օրենսգրքի 308-րդ հոդվածի 1-ին մասով եւ 179-րդ հոդվածի 3-րդ մասի 1-ին կետով: Քրեական գործի նախաքննությունը հանձնարարվել է ՀՀ կառավարությանն առընթեր ոստիկանության Լոռու մարզի քննչական բաժնին: