Առևտրական պատերազմ՝ ԱՄՆ-ի և Ռուսաստանի միջև

ԱՄՆ-ի և Ռուսաստանի միջև կարող է նոր առևտրական պատերազմ սկսվել «Մագնիտսկու ցուցակի» ընդունման հետ կապված:

Մոսկվան արգելք է դրել ռակտոպամինով (սննդային հավելում՝ խոշոր եղջերավոր անասունների և խոզերի մոտ լրացուցիչ մկանային զանգվածներ ավելացնելու համար. ծնթ.՝ Լուրեր.com) սնուցված ամերիկյան արտադրության մսի ներմուծման, այսինքն՝ ԱՄՆ-ից Ռուսաստան ներկրվող ամբողջ մսի ծավալի վրա:

ԱՄՆ-ը կարծում է, որ դա Համաշխարհային առևտրական կազմակերպության նորմերի խախտում է:

Անցյալ հանգստյան օրերին գրեթե դադարել էր ԱՄՆ-ից, Բրազիլիայից, Կանադայից և Մեքսիկայից Ռուսաստան մսի ներկրումը: Անասնաբուժական և բուսասանիտարական դաշնային ծառայության հսկողությունն արգելել էր ռակտոպամին սննդային հավելումով սնուցված մսի ներկրումը:

Դա հատկապես բուռն արձագանք ստացավ ԱՄՆ-ի կողմից, որի համար Ռուսաստանը հանդիսանում է մսի արտահանման շուկայում իր նշանակությամբ 6-րդ գործընկերը: Տարեկան ԱՄՆ-ը Ռուսաստան է արտահանում 500 մլն դոլար արժողությամբ միս:

Ռուսաստանի դրած արգելքը լրջորեն վնասում է ԱՄՆ-ի գյուղատնտեսությանը. կարծում է The Wall Street Journal-ը: Բարաք Օբաման նպատակ էր դրել 2015թ. արտահանման ծավալները կրկնապատկել:

Ռուսաստանն իր հերթին պնդում է, որ ինքը չի արգելում ամերիկյան արտադրության մսի ներկրումը, այլ միայն պահանջում է համապատասխան փաստաթուղթ, որը կվկայի, որ անասունները նման սննդային հավելում չեն ստացել:

Բայց ԱՄՆ-ում չկա համապատասխան լիցենզավորում, ուստի դա նշանակում է մսամթերքի մատակարարման դադարեցում:

Անասնաբուժական և բուսասանիտարական դաշնային ծառայության հսկողությունը պնդում է, որ «Մագնիտսկու ցուցակի» հաստատումը կապ չունի կայացրած որոշման հետ:

«Հիշեցնենք, որ մսամթերքի արտադրության ժամանակ ռակտոպամինի կիրառման անթույլատրելիության մասին Անասնաբուժական և բուսասանիտարական դաշնային ծառայության հսկողությունը հայտարարել էր դեռևս մեկ տարի առաջ»,-ասված է ծառայության հատուկ հայտարարության մեջ: