Երշիկների մեջ տավարի մսին հիմնականում փոխարինում է գոմեշի միսը. ՏՄՊՊՀ

Այսօր ՀՀ տնտեսական մրցակցության պաշտպանության պետական հանձնաժողովի նիստում հրապարակվեցին երշիկեղենի շուկայում ուսումնասիրության արդյունքները, ըստ որոնց երշիկ արտադրող 21 ընկերություններ անբարեխիղճ գործունեություն են իրականացրել:
Անբարեխիղճ գործունեություն իրականացնող ընկերություններն են՝ «Մուշ», «Ա. Բիլյան», «Առ Դելիկատես», «Նատֆուդ», «Ջրվեժի մսամթերքի կոմբինատ», «Մարիլա», «Բաբիկ 90», «Էրեբունի աստղ», «Հայր եւ որդի Գալստյաններ», «Երեմկա», «Էլիտ Պրոդ», «Ա. Շիրվանյան եւ ընկերներ», «Արտյոմ եւ Հրայր եղբայրներ», «Լումա», «Կարինե եւ Նարինե», «Նեպտուն Մար», «Սոս 97», «Տիրան Ղազարյան», «Գայան Ջամե», «Բարի արագիլ», «Արթուր Հակոբյան» ընկերությունները: Ընկերությունների նկատմամբ կիրառվել է օրենքով սահմանված առավելագույն պատժաչափ՝ տուգանք տվյալ ընկերության նախորդ տարվա հասույթի 1%-ի չափով:

Նշվում է, որ երշիկի բաղադրության մեջ օգտագործվող բաղադրիչները փաթեթավորման վրա չեն նշվել եւ երշիկի արտադրության մեջ օգտագործվել է մեծաքանակ օսլա, ալյուր, նիտրիտ, սոյա, ֆոսֆատ, սակայն այդ մասին սպառողները չեն տեղեկացվել:

ՏՄՊՊՀ հանձնաժողովի նիստում տեղեկացրեցին նաեւ, որ գրեթե բոլոր վաճառվող երշիկների վրա նշվում է, որ օգտագործվում է տավարի եւ խոզի միս, սակայն կարատված ուսումնասիրությունների ընթացքում բացահայտվել է, որ օգտագործվում են մեծաքանակ համային եւ գունային հավելանյութեր: Այս մասին եւս սպառողը տեղյակ չի եղել:

Բացահայտվել է, որ երշիկների որոշ տեսակների մեջ մսի մասնաբաժինը կազմում է ընդամենը 16%, իսկ տավարի կամ խոզի մսին հիմնականում փոխարինում է գոմեշի ներկրված միսը:

ՏՄՊՊՀ նախագահ Արտակ Շաբոյանն հայտնեց, որ լաբորատոր հետազոտություններ չեն իրականացվել, բոլոր եզրակացությունները հիմնված են փաստաթղթային ստուգումների վրա: