Ռուսաստանը հրաժարվեց Ադրբեջանում գտնվող Գաբալայի ՌՏԿ–ից

Ռուսաստանը դադարեցրել է Գաբալայի Дарьял տիպի ռադիոտեղորոշման կայանի (ՌՏԿ) շահագործումը Ադրբեջանում: Այս մասին այսօր հաղորդում է РИА Новости-ն՝ հղում կատարելով Ադրբեջանի ԱԳՆ ղեկավարի հայտարարությանը:

Հայտարարության մեջ նշվում է, որ Մոսկվան և Բաքուն չեն կարողացել ռադարի շահագործման վերաբերյալ համաձայնության գալ:

Հիշեցնենք, որ 2012թ. փետրվարին Ադրբեջանը կտրուկ բարձրացրեց Дарьял տիպի Գաբալայի ՌՏԿ-ի վարձակալության տարեկան վճարը՝ 7 մլն ԱՄՆ դոլարից հասցնելով 300 մլն ԱՄՆ դոլարի:

Սեպտեմբերին ռուսական մի շարք լրատվամիջոցներ, վկայակոչելով պաշտպանական ոլորտի աղբյուրներին, պնդում էին, թե կողմերը կարողացել են պայմանավորվել ՌՏԿ-ի վարձակալությունը նախկին պայմաններով ևս 3 տարի շարունակելու վերաբերյալ: Ընթացիկ պայմանագիրը ստորագրվել էր 2002թ. և ավարտվում է 2012թ. դեկտեմբերի 24-ին:

Интерфакс գործակալության ռազմա-դիվանագիտական շրջանակներից աղբյուրը, իր հերթին պատմել է, որ Գաբալայի ՌՏԿ-ի անջատման պատճառով Ռուսաստանը նախատեսում է սեղմ ժամկետներում ողջ հզորությամբ գործարկել Արմավիր քաղաքի մոտ գտնվող Воронеж-ДМ տիպի ՌՏԿ-ն:

Ավելի վաղ հաղորդվում էր, որ արմավիրյան ՌՏԿ-ի նոր հատվածի մարտական հերթապահության անցնելով, այն կփակի Գաբալայի ՌՏԿ-ի գոտին և «կտեսնի» Թուրքիայի, Իրաքի, Իրանի, Հնդկաստանի և Մերձավոր Արևելքի պետությունների տարածքը:

Մոտ ապագայում ՌԴ ՊՆ-ն նախատեսում է ընդհանրապես հրաժարվել հնացած Дарьял, Волга և Днепр տիպի ՌՏ կայանների շահագործումից՝ անցնելով ժամանակակից Воронеж տիպի բազմատիրույթ ռադիոտեղորոշման կայաններին:

Աղբյուրը՝ tert.am