Հերքում են գոմեշի մսի առկայությունը. Արտակ Շաբոյանին դատի կտան

ՀՀ տնտեսական մրցակցության պաշտպանության պետական հանձնաժողովը երեկ հրապարակել է երշիկեղեն արտադրող 21 ընկերությունների անունները, որոնց արտադրանքի մեջ մեծ քանակությամբ սոյա, օսլա, ալյուր, սպիտակաձավար և այլ նյութեր կան: Բացահայտվել է, որ երշիկների որոշ տեսակների մեջ մսի մասնաբաժինը կազմում է ընդամենը 16%, իսկ տավարի կամ խոզի մսին հիմնականում փոխարինում է գոմեշի ներկրված միսը: Նշվում է, որ երշիկի բաղադրության մեջ օգտագործվող բաղադրիչները փաթեթավորման վրա չեն նշվել և երշիկի արտադրության մեջ օգտագործվել է մեծաքանակ օսլա, ալյուր, նիտրիտ, սոյա, ֆոսֆատ, սակայն այդ մասին սպառողները չեն տեղեկացվել:

Այսօր Lurer.com-ը կարողացավ կապ հաստատել 21 ընկերություններից միայն մեկ ընկերության տնօրենի հետ, ով միանգամայն հերքեց Տնտեսական մրցակցության պաշտպանության պետական հանձնաժողովի կողմից արված հաղորդագրությունը:

Իսկ «ԼԱ-ՄԱՔՍ» հոլդինգի տնօրենը (հոլդինգի մեջ է մտնում խախտումներ արած ընկերություններից «Մարիլա» ՍՊԸ-ն), Այլոշա Մկրտչյանը մասնավորապես նշեց, որ  որոշ ժամանակ առաջ տնտեսական մրցակցության պաշտպանության պետական հանձնաժողովը ուսումնասիրություններ է իրականացրել, ուսումնասիրությունների համար պահանջել են նյութեր ձեռբքերման փաստաթղթերը, բաղադրատոմսերը, գնապիտակները, հասույթները, և միայն այդ փաստաթղթերն են ուսումնասիրվել: «Մեր խախտումը եղել է այն, որ պիտակի վրա սննդային հավելումները պետք է բացված և ամբողջական գրված լինեին՝ թե իրականում ինչ է մտնում դրա բաղադրության մեջ, այսինքն մակնիշման կանոնները խախտել ենք: Իրենց պրիտենզիան դա է եղել: Այնուհետև հայտարարություն են տարածել ընդհանուր 21 ձեռնարկության հետ նույն բովանդակությամբ, և դրա մեջ նաև մեր ընեկրության անունն են գրել, որը իրականությանը չի համապատասխանում: Մենք մեր ֆիրմայի միսն ենք միայն օգտագործում: Կարճ ասած, բոլորի ուսումնասիրության արդյունքում, դրա տակ մեր անունն է եղել ու դա այն դեպքում, երբ մեր սխալը եղել է մակնշման հետ կապված»,-ասաց Ալյոշա Մկրտչյանը:

Հարցին, թե ընկերության հետագա քայլերը որոնք են լինելու, վերջինս նշեց, որ իրենք արդեն գրություն են ուղարկել և հորդորում ու պահանջում են, որ իրենք հերքման հայտարարությամբ հանդես գան:

«Թող հայտարարություն տարածեն, որով կհերքեն իրենց հաղորդագրությունը, քանի որ այն ամբողջությամբ մեզ չի վերաբերում, հաղորդագրության մեջ թյուրիմացություն կա, հակառակ դեպքում մենք դատի կտանք տնտեսական մրցակցության պաշտպանության պետական հանձնաժողովին, որի նախագահն է Արտակ Շաբոյանը, որովհետև այդ կերպ մեր գործարար համբավի, իմիջի վրա բացասական ազդեցություն են թողնում»,-եզրափակեց վերջինս:  

Նելլի Ավետիսյան