ՊԵԿ պատասխանը՝ ԱԺ ԲՀԿ–ական պատգամավորին

Արտաքին ապրանքաշրջանառության աճին զուգընթաց անընդհատ կատարելագործվում և փոփոխվում են մաքսանենգ ճանապարհով ապրանքների տեղափոխման ձևերը և տեսակները, հետևաբար կինոլոգիական կենտրոնների շների միջոցով մաքսային զննման իրականացումը դառնում է մաքսային ծառայությունների կողմից ռիսկերի կառավարման առավել արդյունավետ միջոց, ընդլայնում է մաքսային ծառայությունների հնարավորությունները բարձր ռիսկայնության ապրանքների բացահայտման առումով, թույլ է տալիս ուժեղացնել վերահսկողությունը վերահսկելի մատակարարումների նկատմամբ և ավելի օպտիմալ ու արդյունավետ բաշխել աշխատանքային ռեսուրսները:

Մաքսային ծառայությունում գործող կինոլոգիական կենտրոնը կպատրաստի մասնագետներ' ծառայողական շներով աշխատելու համար և կվարժեցնի ծառայողական շներ՝ մաքսային սահմանով ապօրինի տեղափոխվող թմրամիջոցներ, զենք, զինամթերք և պայթուցիկ նյութեր հայտնաբերելու համար:

Կենտրոնի հիմնական գործառույթները կլինեն՝

- Կենտրոնի կինոլոգների և մաքսային մարմինների պաշտոնատար անձանց մասնագիտական վերապատրաստման ժամանակակից համակարգի ներդրումը, ինչպես նաև այն պաշտոնատար անձանց ուսուցման և վերապատրաստման ապահովումը, որոնք շների միջոցով կիրականացնեն մաքսային հսկողություն՝ թմրամիջոցների, զենքի, զինամթերքի և պայթուցիկ նյութերի մաքսանենգության կանխարգելման համար:

- Կենտրոնի գործունեության արդյունավետության, անհրաժեշտ պաշտոնատար անձանցով և ծառայողական շներով, ինչպես նաև գույքով և դեղորայքով կենտրոնի հագեցվածության թեմաներով քննարկումների անցկացումը և վերլուծությունների իրականացումը:

- Կինոլոգների և մաքսային մարմինների պաշտոնատար անձանց համար ծառայողական շների միջոցով օպերատիվ-հետախուզական միջոցառումներ անցկացնելու և արդյունավետ մաքսային հսկողություն իրականացնելու համար անհրաժեշտ պայմանների ստեղծումը:

- Ծառայողական շների ձեռքբերման, վարժեցման, վերապատրաստման և կենտրոնի համալրման աշխատանքների կազմակերպումը:

- Կենտրոնի կինոլոգների մասնակցության ապահովումը օպերատիվ-հետախուզական միջոցառումներին և հետաքննչական գործողություններին՝ որպես կինոլոգ-մասնագետներ:

- Կենտրոնի կինոլոգների կողմից ծառայողական շների աճեցման և պահպանման, դրանց աշխատանքային վիճակում պահելու կանոնների, ինչպես նաև նրանց կողմից հետաքննչական գործողությունների և օպերատիվ-հետախուզական միջոցառումների իրականացման ժամանակ ծառայողական շների օգտագործման սահմանված կարգի և կանոնների պահանջների նկատմամբ հսկողության իրականացումը:

- Այլ երկրների մաքսային մարմինների կինոլոգիական ծառայությունների հետ համագործակցությունը:

Կենտրոնը կունենա անհրաժեշտ շինություններ և սարքավորումներ, ուսումնական վարժանքների համար անհրաժեշտ պարագաներ, անասնաբուժական ծառայություն և դրա համար անհրաժեշտ պարագաներ:

Կինոլոգիական կենտրոնի ստեղծումը կբարձրացնի ՀՀ մաքսային սահմանով ապօրինի տեղափոխվող թմրամիջոցների, զենքի, զինամթերքի և պայթուցիկ նյութերի նկատմամբ իրականացվող մաքսային հսկողության արդյունավետությունը և կնպաստի դրանց ապօրինի շրջանառության դեմ պայքարին: