Բարբարոսները պղծել են Երուսաղեմի հայկական գերեզմանատունը և հունական մենաստանը

Երուսաղեմում բարբարոսները հակաքրիստոնեական գրություններ են թողել Սուրբ Խաչ ուղղափառ մենաստանի և հայկական գերեզմանատան դարպասների վրա: Այս մասին հաղորդում է Agence France-Presse-ը:

Հունական ուղղափառ եկեղեցուն պատկանող մենաստանի վանահայրը հաղորդել է, որ գրությունները տեսել է առավոտյան 4:30-ին: Անհայտ անձիք պատերին եբրայերենով մի շարք կարգախոսեր են թողել, ինչպիսիք են «Մահ քրիստոնեությանը» և այլն: Վանահոր խոսքով, սա արդեն 7-րդ դեպքն է, երբ բարբարոսները պղծում են մենաստանը:

«Հրեական արժեքները, որոնցով մենք դաստիարակվել ենք և որոնցով դաստիարակում ենք մեր երեխաներին, խստորեն դատապարտում են նման քայլերը: Պաշտամունքի ազատությունն Իսրայելի բոլոր կրոնների համար պահպանվելու է, իսկ նման հանցագործություններ կատարած անբարո մարդկանց նկատմամբ կիրառվելու են իրավական պատժամիջոցներ»,- ասվում է Իսրայելի վարչապետի գրասենյակի հայտարարության մեջ:

Ենթադրվում է, որ կատարվածի ետևում կանգնած են աջ աարմատականները: Ոստիկանությունը բարբարոսության փաստով հետաքննություն է սկսել:

panarmenian.net