Ռուսաստանի ԱԳՆ-ն հերքում է Ասադի ռեժիմի տապալման իր կանխատեսումները

Ռուսաստանի ԱԳՆ-ն հակասական ազդակներ է ուղարկում Սիրիայի հարցում Մոսկվայի դիրքորոշման կապակցությամբ. հայտնում է BBC-ն: Այն բանից հետո, երբ ԱՄՆ-ի պետքարտուղարությունը ողջունել էր ՌԴ ԱԳՆ-ի արած հայտարարությունն այն մասին, որ Ռուսաստանը չի բացառում Ասադի ռեժիմի տապալումն ու ընդդիմության հաղթանակը, ռուսական արտաքին քաղաքական գերատեսչությունը հասկացնել էր տվել, որ այդ բառերը պաշտոնական դիրքորոշում չեն արտահայտում:

Հինգշաբթի օրը Ռուսաստանի փոխարտգործնախարար Միխայիլ Բոգդանովը հայտարարել էր, որ Ասադի հակառակորդները կարող են հաղթանակ տանել իշխող ռեժիմի դեմ մղվող պայքարում: Ասադի ռեժիմը գնալով կորցնում է իր վերահսկողությունը երկրի տարածքների նկատմամբ: Ուստի չի կարելի բացառել ընդդիմության հաղթանակը:

Այս հայտարարությունը ողջունվել էր արևմտյան մի շարք երկրների կողմից:

Իսկ ԱՄՆ-ի պետքարտուղարության պաշտոնական ներկայացուցիչ Վիկտորիա Նուլանդը նշել էր, որ Ռուսաստանը վերջապես բաց աչքերով է գնահատում իրավիճակը:

Սակայն ուրբաթ օրը Ռուսաստանի ԱԳՆ պաշտոնական ներկայացուցիչ Ալեքսանդր Լուկաշևիչը հայտնել էր, որ Բոգդանովը վերջին օրերին Սիրիայի իրավիճակի հետ կապված ոչ մի հատուկ հայտարարություն չի արել: Լուկաշևիչը պարզաբանել է, որ Հասարակական պալատում բանավեճերի ժամանակ մեջբերվել են սիրիական ընդդիմության ներկայացուցիչների հայտնի պնդումները, որոնք կանխատեսում են իրենց շուտափույթ հաղթանակը Դամասկոսում:

Բոգդանովն իր ելույթում կրկին պնդել է ռուսական պաշտոնական դիրքորոշումը՝ Սիրիայի հակամարտության հարցում հավատարիմ մնալ ժնևյան կոնվենցիաներին. նշել է ԱԳՆ ներկայացուցիչը: