Սաուդյան Արաբիայում ավարտվել են ռուս-ամերիկյան բանակցությունները

Էր Ռիադում ավարտվել են ռուս-ամերիկյան բանակցությունները, հանդիպումը տեւել է մոտ 4,5 ժամ։ ՌԴ նախագահի օգնական Յուրի Ուշակովի խոսքով՝ բանակցությունները լավ են անցել։

«Շատ լուրջ խոսակցություն է եղել բոլոր այն հարցերի շուրջ, որոնց մասին ցանկանում էինք բարձրաձայնել»,- ասել է Ուշակովը, մեջբերում են ռուսական լրատվամիջոցները։

ՌԴ նախագահի օգնականի խոսքով՝ Մոսկվան ու Վաշինգտոնը պայմանավորվել են հաշվի առնել միմյանց շահերը։

Ուշակովը նաև հայտնել է, որ Ռուսաստանի և ԱՄՆ նախագահներ Վլադիմիր Պուտինի ու Դոնալդ Թրամփի հանդիպման կոնկրետ ժամկետները դեռ որոշված ​​չեն, բայց դա դժվար թե տեղի ունենա հաջորդ շաբաթ։

«Մեզ անհրաժեշտ է սերտ աշխատանք երկու երկրների պատվիրակությունների կողմից։ Մենք պատրաստ ենք դրան, բայց դեռ դժվար է խոսել երկու առաջնորդների հանդիպման կոնկրետ ժամկետի մասին»,- նշել է նա։

Ուշակովի խոսքով՝ Ռուսաստանի և ԱՄՆ-ի պատվիրակությունները բանակցությունների ընթացքում ուրվագծել են նաև իրենց դիրքորոշումները ուկրաինական հարցի վերաբերյալ։

«Մենք քննարկեցինք, ուրվագծեցինք մեր հիմնարար մոտեցումները և պայմանավորվեցինք, որ այս թեմայի շուրջ բանակցողների առանձին թիմերը ժամանակին կապ կհաստատեն միմյանց հետ»,- ասել է ՌԴ նախագահի օգնականը։

«Ամերիկացիները պետք է նշանակեն իրենց ներկայացուցիչներին, մենք կնշանակենք մերը, իսկ հետո, հավանաբար, աշխատանքները կշարունակվեն»,- ասել է Ուշակովը։