Վրացական արտադրանքը ռուսական շուկա վերադարձնելը Ռուսաստանի միջազգային պարտականությունն է

Ռուսաստանի հարցերով Վրաստանի վարչապետի հատուկ ներկայացուցիչ Զուրաբ Աբաշիձեն հայտարարել է, թե քանի որ Վրաստանն օգնել է Ռուսաստանին մտնել Համաշխարհային առևտրական կազմակերպություն, այժմ Ռուսաստանը ոչ թե իր բարի կամքով, այլ միջազգային պարտավորվածությամբ պետք է օգնի վրացական ապրանքները վերադարձնել ռուսաստանյան շուկա. փոխանցում է Грузия Online-ը:

Աբաշիձեն մամլո խորհրդակցության ժամանակ նաև նշել է, որ վրացական ապրանքների վերադարձը ռուսական շուկա կհզորացնի Վրաստանին:

«Այստեղ խոսքը ոչ միայն թվերի ու, ասենք, գինու մասին է, այլև մարդկանց: Այս տարիներին ոչ միայն վրացական ապրանքը չէր կարողանում արտահանվել ռուսական շուկա, այլև ռուս գործարարները ձեռնպահ էին մնում Վրաստանում ներդրումներ կատարելուց՝ ելնելով քաղաքական պատկերացումներից: Ռուսաստանում ապրում են շատ հարուստ վրացիներ, ովքեր կցանկանային ներդրում կատարել այստեղ»,-հայտարարել է Աբաշիձեն և նշել, որ հետագայում այդ հարցի նկատմամբ մոտեցումը կփոխվի: