Ընդունելություն ՀՀ գյուղատնտեսության նախարար Սերգո Կարապետյանի մոտ

Այսօր ՀՀ գյուղատնտեսության նախարար Սերգո Կարապետյանն ընդունեց Ֆրանսիական զարգացման գործակալության Հարավային Կովկասում իրականացվող ծրագրերի գլխավոր մասնագետ Վաչե Փափազյանին:

Ողջունելով հյուրին, նախարարը համառոտակի անդրադարձավ Անկախությունից ի վեր Հայաստանի գյուղատնտեսության ոլորտում հաստատված իրավիճակին և այն խնդիրներին ու հիմնահարցերին, որոնց լուծման գործում ՀՀ գյուղատնտեսության նախարարությունն ակնկալում է նաև Ֆրանսիական զարգացման գործակալության աջակցությունը: Ընդգծվեց հատկապես տնտեսությունների խոշորացման և գյուղատնտեսական կոոպերատիվների ստեղծման անհրաժեշտությունը:

Շնորհակալություն հայտնելով ընդունելության համար, պարոն Վաչե Փափազյանն ասաց, որ իրենց կազմակերպությունը համագործակցության առաջին քայլերն է կատարում Հայաստանի մի շարք գերատեսչությունների, մասնավորապես Ֆինանսների և Տարածքային կառավարման նախարարությունների հետ: Համագործակցության հաջորդ ոլորտը, ըստ հյուրի,գյուղատնտեսությունն է, և իրենք պատրաստ են ներկայացնել կազմակերպության զեկույցը՝ գործակցության հնարավորությունների երեք կարևոր սեկտորներով'

- Ոռոգման համակարգի բարելավում:

- Տարածքների կառավարում և զարգացում համայնքների միջոցով:

- Շուկայի ապահովածության որակի և նորմերի ուսումնասիրություններ:

«Շնորհակալությամբ ենք ընդունում համագործակցության հրավերը և պատրաստ ենք ըստ ամենայնի աջակցել նախապատրաստական բոլոր աշխատանքներին»,- նշեց նախարար Սերգո Կարապետյանն՝ առաջարկելով հնարավորինս հանգամանորեն ներկայացնել գործակալության դիտարկումները, վերջիններիս կոնկրետ ծրագրային լուծումներ տալու համար: