«Գյուղատնտեսությունը համագործակցելու մեծ ներուժ ունի երկու պետությունների համար». Ֆելիքս Վալուա Պիրես

ՀՀ գյուղատնտեսության նախարար Սերգո Կարապետյանն այսօր ընդունել է ՀՀ-ում Բրազիլիայի Հանրապետության գործերի ժամանակավոր հավատարմատար Ֆելիքս Վալուա Պիրեսին՝ վերջինիս խնդրանքով:

Ողջունելով Ֆելիքս Վալուա Պիրեսին՝ ՀՀ գյուղատնտեսության նախարար Սերգո Կարապետյանն անդրադարձել է երկու երկրների միջև հաստատված փոխադարձ հարգանքին ու բարեկամությանը և կարևորել է երկկողմ համագործակցությունը գյուղատնտեսության բնագավառում ավելի սերտացնելու անհրաժեշտությունը: ՀՀ գյուղատնտեսության նախարարը հակիրճ ներկայացրել է Հայստանում գյուղատնտեսության ներկայիս վիճակը և տեղեկացրել, որ ՀՀ կառավարությունը մեծ ուշադրություն է դարձնում ոլորտի զարգացմանը և Համաշխարհային բանկի հետ համատեղ մշակել է գյուղի և գյուղատնտեսության զարգացման տասնամյա ռազմավարական ծրագիր: Այն նպատակ ունի մինչև 2020 թվականը Հայաստանը դարձնել ինքնաբավ՝ պարենամթերքի պահանջարկի նկատմամբ:

ՀՀ գյուղատնտեսության նախարարը նշել է նաև, որ Բրազիլիան ունի զարգացած գյուղատնտեսություն և իրատեսական է բրազիլիական կողմի հետ առավել սերտացնելու համագործակցությունը:

Հանդիպման ընթացքում ՀՀ գյուղատնտեսության նախարար Սերգո Կարապետյանը հիշատակել է, որ երկկողմ համագործակցության զարգացման խթանելու համար ՀՀ գյուղատնտեսության նախարարությունը մշակել և բրազիլիական կողմի քննարկմանն է ներկայացրել համագործակցության միջգերատեսչական համաձայնագրի նախագիծ: Շնորհակալություն հայտնելով ընդունելության համար՝ պարոն Պիրեսը նշել է. «Համակարծիք եմ, որ գյուղատնտեսությունն համագործակցելու մեծ ներուժ ունի մեր երկու պետությունների համար, և նպատակահարմար եմ համարում առավել մանրամասն ուսումնասիրել փոխշահավետ համագործակցության ուղղությունները»:

Հանդիպման ավարտին, ՀՀ-ում Բրազիլիայի Հանրապետության գործերի ժամանակավոր հավատարմատար Ֆելիքս Վալուա Պիրեսին առաջարկել է 2013 թվականին կազմակերպել ՀՀ գյուղատնտեսության նախարար Սերգո Կարապետյանի պաշտոնական այցը Բրազիլիա՝ համագործակցության հնարավորությունները առավել մանրամասն ուսումնասիրելու և համաձայնագիր ստորագրելու նպատակով: