SATTO ծրագիրը հաջողությամբ համագործակցում է Էկոնոմիկայի նախարարության հետ

Դեկտեմբերի 21-ին ՀՀ էկոնոմիկայի նախարարությունում տեղի ունեցավ մամուլի ասուլիս նվիրված SATTO ծրագրի արդյունքներին: Ասուլիսի բանախոսներն էին ՀՀ Էկոնոմիկայի նախարարի տեղակալ Գարեգին ՄԵԼՔՈՆՅԱՆԸ և SATTO ծրագրի ղեկավար Պատրիկ ՄՈՒՆԻԵ-ԼՈՄՊՐԵՆ:

Եվրոպական Միության կողմից ֆինանսավորվող SATTO` «Աջակցություն Հայաստանի Հանրապետության էկոնոմիկայի նախարարության ԵՄ ծրագրերի բաժնին՝ Twinning & TAIEX գործառույթների իրականացմանը» ծրագիրը գործում է 2009 թվականի մարտից:

Ծրագրի նպատակն է աջակցել ՀՀ էկոնոմիկայի նախարարությանը` համակարգելու Twinning և TAIEX` ԵՄ կողմից ֆինանսավորվող ինստիտուցիոնալ բարեփոխումների գործիքները և օժանդակել ՀՀ պետական մարմիններին` դրանք կիրառելու գործընթացներում:

SATTO-ն հիմնականում ակտիվորեն աջակցում է ՀՀ Էկոնոմիկայի նախարարության կառուցվածքում գործող ԵՄ ծրագրերի համար պատասխանատու առանձնացված ստորաբաժանմանը և հնարավոր շահառու պետական մարմիններին:

Twinning և TAIEX գործիքները նպաստում են ՀՀ և ԵՄ անդամ-պետությունների հանրային կառավարման մարմինների անմիջական համագործակցությանը և օժանդակում ՀՀ օրենսդրության մոտարկմանը ԵՄ ստանդարտներին, ինչպես նաև նպաստում են ներկայումս իրականացվող Հայաստան-ԵՄ Ասոցիացման համաձայնագրի և Խոր և համապարփակ ազատ առևտրի համաձայնագրի վերաբերյալ իրականացվող բանակցությունների գործընթացին:

2009 թվականից մինչ օրս Հայաստանում իրականացվել է ավելի քան 70 TAIEX միջոցառում: Ներկայումս իրականացման տարբեր փուլերում են գտնվում 18 TWINNING ծրագրեր, 2 ծրագիր արդեն իսկ ավարտվել է: