Ամանորին ընդառաջ` գները բարձրացել են և դեռ կշարունակեն բարձրանալ. Արմեն Պողոսյան

Ամանորին ընդառաջ` Հայաստանում ապրանքների գներն արդեն իսկ ավելացել են 10-12 տոկոսով, բայց բարձրացումներ կրկին սպասվում են: Այս մասին Լուրեր.com-ի հետ զրույցում ասաց սպառողների ասոցացիայի նախագահ Արմեն Պողոսյանը:

Վերջինիս խոսքերով՝ պետական վիճակագրությունն ասում է, որ գները թանկացել են 3.5 տոկոսի սահմաններում: «Այստեղ կա տարբերություն մեթոդական առումով: Պետական վիճակագրությունը գործում է իր մեթոդաբանությամբ և ուսումնասիրում է 800-900 ապրանք և ծառայություն: Եվ դրա մեջ կորում է կենսական առաջին անհրաժեշտության ապրանքների վիճակը: Կան այնպիսի ապրանքներ և ծառայություններ, որոնցից հայ մարդը շատ հազվադեպ է օգտվում: Մենք 100 հազար անգամ ասել ենք, որ պետք է առանձնացվի 20-25 ապրանք և ծառայություն, և այդ սահմաններում գնի դինամիկան ուսումնասիրել և հրապարակել: Կան ապրանքներ, առանց որի մարդը չի կարող ապրել: Եթե այդ 20-25-ն առանձնացվի ու այդ սահմաններում իրականացվի դիտարկումը, կերևա իսկական գների դինամիկան և բարձրացումը»,-ասաց Արմեն Պողոսյանը:

Սպառողների ասոցիացիայի նախագահը նշեց նաև, որ կան ապրանքներ, որոնց գները թռիչքաձև են բարձրանում գները: «Դրանք հենց Նոր տարվա հետ կապված աժիոտաժի հետևանքներ են: Դրա մեջ մտնում է միրգը, աղանդերը: Օրինակ ընկույզն արդեն 10-12 հազար է դարձել, որը մեծ թռիչք է, կամ օրինակ լոլիկը, ցիտրուսները, որոնք որոշ չափով առաջին անհրաժեշտության չեն, այդտեղ անվերահսկելի ձևով են բարձրանում գները, իսկ տեղական մրգերը այդքան ոչ: Նաև թանկանում են մսի որոշ տեսակներ. փափուկ միսը, ազդրը: Փափուկ միսն ուրիշ կատեգորիա է և շատ է բարձրանում»,-ասաց Պողոսյանը:

Հարցին, թե ամեն տարի նույն տոկոսի չա՞փ են բարձրանում գները, Արմեն Պողոսյանն ասաց, որ ըստ իրենց դիտարկումների՝ այս տարի գների բարձրացումն ավելի մեղմ է, քան նախորդ տարի: