Սփյուռքի նախարարության 2012 թ. գործունեության հաշվետվություն

Դեկտեմբերի 24-ին կայացած մամլո ասուլիսում ՀՀ սփյուռքի նախարար Հրանուշ Հակոբյանն ամփոփեց 2012թ. ՀՀ սփյուռքի նախարարության գործունեությունը: Նախարարի խոսքով՝ կարելի է արձանագրել, որ նկատելի են դառնում սկսված ծրագրերի արդյունքները, Հայաստան-Սփյուռք գործակցությունը տեղափոխվում է նոր մակարդակ, Սփյուռքն ավելի է համախմբվում Հայրենիքի շուրջ, և գնալով ավելանում է մեր մրցակցային առավելությունը: Համագործակցությունը շարունակում է դինամիկ կերպով զարգանալ՝ հենվելով նոր գործիքների, կառուցակարգերի և վստահության ամրապնդման վրա: Հայաստանի կայունությունը, զարգացման միտումները, երկրի՝ միջազգային վարկի բարձրացումը նպաստում են Հայրենիք-Սփյուռք գործակցության զարգացմանը, սփյուռքահայերը ձգտում են դեպի Հայրենիք, առավել հայաստանակենտրոն են դարձել: 2012թ. ՀՀ սփյուռքի նախարարության ծրագրերն իրականացնելիս հիմք են ընդունվել ՀՀ կառավարության 2012թ. ծրագրերում ընդգրկված գերակա խնդիրները: Իրականացվել են մեծածավալ և բազմաբնույթ միջոցառումներ, ինչպիսիք են համահայկական մասնագիտական համաժողովները, «Իմ Հայաստան» փառատոնը, «Սփյուռք» ամառային դպրոցը, «Արի տուն 2012» ծրագիրը, հետազոտությունների իրականացումը և այլն, սակայն ընթացիկ տարում նախարարության առանձնահատուկ ուշադրության կենտրոնում են եղել հատկապես սիրիահայերի հիմնախնդիրները:

Հայրենիք-Սփյուռք գործակցության արդյունավետության հարցում նախարարը կարևորեց երկքաղաքացիության ինստիտուտի կայացումը, առավել մեծ թվով սփյուռքահայերի՝ Հայաստանի Հանրապետության քաղաքացիության ստացումը: Նախարարը ևս մեկ անգամ ընդգծեց հայկական լոբբիի գործոնը համահայկական նշանակության երկու հիմնահարցերի Լեռնային Ղարաբաղի հիմնախնդրի խաղաղ կարգավորման և Հայոց ցեղասպանության ճանաչման գործում:

Նախարար Հ. Հակոբյանը, 2012 թվականի ձեռքբերումները մատնանշելով, կարևորեց Սփյուռքում գործող համահայկական կազմակերպությունների, աշխարհի 100 երկրների հայ համայնքներում գործող 30.000 կառույցների վստահությունն ու փոխգործակցությունը. այսօր բոլոր համահայկական կառույցներն իրենց ծրագրերն իրականացնում են ՀՀ սփյուռքի նախարարության հետ համագործակցությամբ:

Այնուհետև նախարարը նախանշեց 2013 թվականի անելիքները: Հաշվի առնելով միտումը, որ բազմաթիվ այլադավան հայեր մկրտվում են Հայ Առաքելական եկեղեցում՝ շարունակվելու են նրանց հետ տարվող աշխատանքները: Նոր թափ են ստանալու Հայաստանում գտնվող սիրիահայերի ինտեգրման, հիմնախնդիրների լուծմանն ուղղված, ինչպես նաև իրաքահայերի ինտեգրման աշխատանքները: Առաջիկա ծրագրերում դարձյալ ուշադրության կենտրոնում են լինելու մասնագիտական ընկերակցությունների ընդլայնումը, ինչպես նաև՝ «Հայերն առանց ծխախոտի» նոր ծրագիրը՝ Գրանդ Տոբակոյի հետ: 2013 թվականին կկազմակերպվի երիտասարդների համահայկական համաժողովը՝ նվիրված մայրենիի պահպանմանը:

Կընդլայնվի համագործակցությունը, կավելանան համատեղ ծրագրերը համահայկական կառույցների հետ: Կշարունակվի մասնագիտական միությունների ընդլայնումը և նորերի ստեղծումը: