Մի ժողովուրդ, մի գրականություն

Դեկտեմբերի 25-ին ՀՀ սփյուռքի նախարար Հրանուշ Հակոբյանը մասնակցեց Հայաստանի գրողների միության վարչության ամփոփիչ նիստին:

ՀԳՄ նախագահ Լևոն Անանյանը ներկայացրեց անցնող տավա ընթացքում միության ձեռքբերումներն ու նշանակալի իրադարձությունները: Անանյանի խոսքով՝ միության գործունեությունում հատկապես նշանակալի են եղել ՀՀ սփյուռքի նախարարության հետ համատեղ իրականացված ծրագրերը: 2012-ի փետրվարին Հայաստանի գրողների միության նախագահության որոշմամբ 80 սփյուռքահայ գրողներ արտոնվել են միության լիիրավ անդամներ դառնալ: Երևույթը լայն արձագանք ստացավ Սփյուռքում, իրականություն դարձավ Ավ. Իսահակյանի «Մի ժողովուրդ, մի գրականություն» տեսլականը: Լ. Անանյանը կարևոր ձեռնարկ համարեց ապրիլին կայացած Գրողների 6-րդ համաժողովը, որին մասնակցում էին հայ գրողներ աշխարհի տարբեր երկրներից: 2013-ի անելիքները նախանշելիս Լ. Անանյանը կարևորեց Սփյուռքի նախարարության հետ համատեղ ծրագրված օտարագիր հայ երիտասարդ գրողների հետ տարվող աշխատանքներն ու համաժողովը:

ՀՀ սփյուռքի նախարար Հրանուշ Հակոբյանը բարձր գնահատեց նախարարության ստեղծման պահից ի վեր գրողների միության միջև սերտ համագործակցությունը: Դրա վառ ապացույցը համատեղ ձեռնարկներն են, համաժողովների ու հանդիպումների իրականացումը, «Վիլյամ Սարոյան», «Հայերենի պաշտպան» հուշամեդալների հիմնումը: Նախարար Հակոբյանը փաստեց, որ մեր օրերում պետությունը հասել է այն վիճակին, որ բոլոր կարևոր ու մնայուն, գրական արժեք ունեցող ստեղծագործությունները տպագրվում են: Նախարարը հորդորեց նիստին մասնակից գրողներին ու հրապարակախոսներին իրենց սուր միտքն ու գրիչը չխնայել՝ համայն աշխարհին ներկայացնելու մեր օրերի կարևորագույն համահայկական նշանակության հարցերը՝ Ցեղասպանության ճանաչմանն ու դատապարտմանը, Լեռնային Ղարաբաղի հիմնահարցին, Թուրքիայի ու Ադրբեջանի՝ հայատյաց ու հայկական Սփյուռքի ջլատմանը միտված քայլերին: Նախարար Հակոբյանը գրողների ուշադրությունը հրավիրեց այն խնդրին, որ ներկայում անտեսված է Ցեղասպանության հետևանքների լուսաբանումն ու արծարծումը:

Հանդիպման ավարտին՝ նախարար Հրանուշ Հակոբյանը «Վիլյամ Սարոյան» հուշամեդալով պարգևատրեց Վազգեն Գաբրիելյանին և Արծրուն Ավագյանին: