Կասպարովի «շախմատային խաղը» Պուտինի հետ

Գարի Կասպարովը հարցազրույց է տվել լեհական Newsweek Polska պարբերականին` անդրադառնալով Ռուսաստանում վարվող քաղաքականությանը և շախմատին: 

Գարի Կասպարովը, որը մեր ժամանակների մեծագույն շախմատիստներից է, այժմ իր ուշադրությունը կենտրոնացրել է  Ռուսաստանի ընդդիմադիր շարժման ապագան կերտելու վրա՝ հանդես գալով նախագահ Վլադիմիր Պուտինի իշխանության դեմ:

Գարի Կասպարովը, որը շախմատը ներկայացրել է ոչ միայն սոսկ խաղ, այլ նաև հոգեբանություն, անդրադարձ է կատարել նաև Ռուսաստանի քաղաքականությանը: Նա նշել է.«Ռուսաստանում քաղաքականություն չկա, այլ գոյություն ունի ուղղակի ոչ հավասար ուժերի պայքար»: Որպես ապացույց նա նշել է այն դժվարությունները, պատմել հետապնդումների և ձերբակալության մասին, որոնց հանդիպել է Ռուսաստան վերադառնալիս: Նա  ավելացրել է՝ իր նպատակն այն է, որ Ռուսաստանի բնակչությունը եվրոպացիների նման ապրի ազատության մեջ:

 «Կառավարությունը փորձում է ներկայացնել, որ ընդդիմադիր ուժերը զբաղվում են միայն անօրինական հանրահավաքներ կազմակերպելով, սակայն ես այժմ շատ եմ աշխատում հատկապես «Ռուսաստանն առանց Պուտինի» գաղափարի վրա»,-ասել է նա:

Այն հարցին, թե ինչու չի մասնակցել Լյուբիանկայում դեկտեմբերի 15-ին տեղի ունեցած հանրահավաքին, Կասպարովը պատասխանել է, որ այդ հանրահավաքը նվիրված է եղել նախագահական ընտրություններից հետո ընդդիմադիր ուժերի կազմակերպած հանրահավաքների տարելիցին և իրենից ներկայացրել է միայն հուսահատություն և հավատ ապագա գործողությունների նկատմամբ, սակայն ինքը ավելի կարևորում է այն քայլերը, որոնք կարող են արդյունք ունենալ:

Կասպարովը նաև անդրադարձել է Ռուսաստանում առկա քաղաքական իրավիճակին: Նա նշել է, որ Պուտին իր իշխանությունը պահում է անվտանգության ուժերի միջոցով: Երկրում առկա է կաշառակերություն. Պուտինը կարողանում է կաշառել ոչ միայն ռուս իշխանավորներին, այլ նաև եվրոպացի բարձրաստիճան պաշտոնյաներին, այդ թվում՝ Գերմանիայի նախկին կանցլեր Գերհարդ Շրոդերին, Իտալիայի նախկին վարչապետ Սիլվիո Բերլուսկոնիին և այլոց:

Այն հարցին, թե արդյոք ինքը կարող է դառնալ ընդդիմադիր ուժերի լիդեր և ՌԴ նախագահ, Կասպարովը պատասխանել է, որ եթե ժողովուրդն ընտրի իրեն որպես առաջնորդ, ապա հնարավոր է, սակայն ոչ ներկա պայմաններում, երբ ընտրություններին մասնակցելը կարող է ունենալ միայն ձևական բնույթ: Այդ պատճառով պետք է նախ Եվրոպայի ճնշման միջոցով հասնել ազատ և անկախ ընտրությունների, այնուհետև հետ բերել մարդկանց հավատը իշխանությունների նկատմամբ և պատրաստել իշխանության անցումը, որը  հնարավորինս ոչ ցավալի պետք է լինի ռուս ժողովրդի համար: