«Տեխնիկական հնարավորությունները բավարար են ՀՀ բոլոր ճանապարհները մաքրելու համար». Գ. Բեգլարյան

Հանրապետությունում տեղացած և շարունակվող ձյան առատ տեղումների, ուժեղ բքի ու մառախուղի պատճառով Հայաստանի մի շարք միջպետական և հանրապետական նշանակության ճանապարհներին ստեղծված իրավիճակին տեղում ծանոթանալու նպատակով Հայաստանի Հանրապետության տրանսպորտի եւ կապի նախարար Գագիկ Բեգլարյանը հունվարի 9-ին այցելեց Արագածոտնի եւ Շիրակի մարզեր։

Նախարարի առաջին կանգառը Արագածոտնի մարզպետարանում էր, որտեղ տեղի ունեցած խորհրդակցության ժամանակ Արագածոտնի մարզպետ Սարգիս Սահակյանը եւ մարզի ճանապարհները սպասարկող ընկերությունների ներկայացուցիչները նախարարին ներկայացրին ճանապարհների մաքրման հետ կապված աշխատանքները, խնդիրներն ու դժվարությունները։

Նրանց խոսքով՝ հիմնական դժվարություններն առաջանում են տեխնիկայի պակասից։ Լեռնային գոտում, որտեղ ձմեռը խստաշունչ ու ցուրտ է, եղած տեխնիկան չի բավարարում աշխատանքներն ամբողջությամբ կազմակերպելու համար։

Լսելով նրանց՝ նախարարն ընդգծեց, որ տեխնիկայի անհրաժեշտությունը կարևոր է, սակայն, եթե աշխատանքները ճիշտ կազմակերպեն, եղած տեխնիկայով ևս հնարավոր կլինի ճանապարհներն արդյունավետ մաքրել:

«Այս պահին տեխնիկական հնարավորությունները բավարար են Հայաստանի բոլոր ճանապարհները մաքրելու համար։ Ձմռանը պետք է պատրաստվել կոնկրետ հաշվարկներով և միմյանց օգնելով: Օրինակ, կարելի է Արագածոտնի մարզ տեղափոխել Արարատյան դաշտը սպասարկող ճանապարահաշինական կազմակերպությունների տեխնիկան, որը հաճախ ձյան բացակայության պատճառով չի աշխատում այնտեղ»,- ասաց նախարարը՝ հավելելով, որ գարնան առաջին իսկ օրվանից արդեն պետք է նախապատրաստվել մյուս տարվա ձմռանը:
Նախարարն անդրադարձավ նաև տարբեր լրատվամիջոցներով երբեմն հնչող այն «քննադատություններին», որ թե՛ լեռնային գոտիներում եւ թե՛ Արարատյան դաշտավայրում աշխատող Ճանշիններին ձյան մաքրման աշխատանքների համար նույն չափով են հատկացումներ արվում։ Նա նշեց, որ նման բան չկա, որ լեռնային հատվածներում աշխատող ընկերությունները վճարվում են երեք անգամ ավելի: Արագածոտնից Շիրակի մարզ ուղեւորվելու ճանապարհին ակնհայտ էր, որ չնայած ձնաբուքն ու թույլ տեսանելիությունը խոչընդոտում են երթեւեկությանը, սակայն Ճանշինները հիմնականում կարողացել են ապահովել ճանապարհների անցանելիությունը։

Քուչակ-Ապարան ճանապարհահատվածում ուժեղ բուք էր ու մառախուղ. նախարարի հրահանգով այդ ճանապարհահատված տեղափոխվեց ճանապարհը սպասարկող ընկերության ձյունմաքրող հիմնական տեխնիկան։ Ինտենսիվ աշխատանքի շնորհիվ կանխվեցին ճանապարհի ձնակուտակումները։ Քուչակ-Ապարան ճանապարհահատվածին էլ «Վազ 2107» մակնիշի ուղեւորներով լի ավտոմեքնան էր դուրս եկել ճանապարհի երթեւեկելի մասից եւ խրվել ձյան շերտի մեջ: Ավտոմեքենան երթեւեկելի հատված դուրս բերվեց նախարարության աշխատակիցների օգնությամբ:

Արագածոտնից մինչև Շիրակի մարզ ձգվող ամբողջ ճանապարհին ՀՀ տրանսպորտի և կապի նախարար Գագիկ Բեգլարյանը ծանոթացավ իրականացված և այդ պահին ճանապարհների տարբեր հատվածներում ընթացող բազմաթիվ աշխատանքների, ինչպես նաև մի շարք թերացումներ արձանագրեց: Շիրակի մարզպետարանում ամփոփելով այցի արդյունքները՝ նախարարը նշեց, որ հիմնականում գոհ է կատարված աշխատանքներից, սակայն կան նաև լուրջ թերացումներ։ Գ. Բեգլարյանը հատկապես դժգոհ էր «Ապարանի ՃՇՇՁ» եւ «Հովհաննես Մարտիրոսյան» ընկերությունների կատարած աշխատանքից. «Կան կազմակերպություններ, որոնք ունեն մեծ քանակով տեխնիկա եւ կարող են երկար տարածություն ունեցող ճանապարհներ սպասարկել, սակայն կան նաեւ այնպիսիք, որոնք չունեն այդ հնարավորությունը եւ չեն բավարարում բնակիչների պահանջները: Այս խնդիրները կքննարկենք եւ գուցե չեղյալ հայտարարենք որոշ կազմակերպությունների հետ կնքած պայմանագրերը»,- ասաց նախարարը:

Խորհրդակցությանը հաջորդեց նախարար Գագիկ Բեգլարյանի ճեպազրույցը լրագրողների հետ, որտեղ նա արդյունավետ համարեց աշխատանքային այցը: