Ադրբեջանի հակահայկական քարոզչությունը՝ ռուսական հեռուստաալիքով (տեսանյութ)

Հունվարի 9-ին Ռուսաստանի կենտրոնական հեռուստաընկերություններից մեկով՝ PTP 1-ով, հանդես էր եկել Ալեքսանդր Պրոխանովը՝ անդրադառնալով ԽՍՀՄ-ի փլուզմանը և Լեռնային Ղարաբաղի հարցին, որն, իր ներկայացմամբ, եղել է պատմական ադրբեջանական տարածք:

Նա, հաղորդման ընթացքում ԽՍՀՄ-ը ներկայացնելով միջկրոնական, լեզվական, ազգային հանրություն, նշում է, որ վերջինիս մեծ հարված հասցրեց Ղարաբաղի հարցը, որտեղ ադրբեջանցիներն ու հայերը փոխադարձ թշնամանք էին զգում իրար նկատմամբ: Նա պատմում է 1988 թվականից առաջ տեղի ունեցած դեպքերը, նշելով, թե իբր հայերն ատելություն էին տածում ադրբեջանցիների նկատմամբ, որոնք տիրել են հայկական հողերին, խմում են իրենց ջուրը և այլն: Այդ պատճառով հայերը ստիպեցին «կաֆանական ադրբեջանցիներին լքել իրենց տները: Նշենք, որ կաֆանական հողեր ասելով՝ հասկանում է հայկական Կապան քաղաքը:

Նա նշում է, որ կանայք, երեխաները, ծերունիները բռնագաղթեցին իրենց տներից և հաստատվեցին Սումգայիթում: Սումգայիթում հաստատվածներն «արդար» ատելություն էին զգում հայերի նկատմամբ, երբ սկսեցին Սումգայիթի դեպքերը: Այսինքն՝ փորձում է նշել, որ Սումգայիթյան դեպքերում առաջին մեղավոր են եղել հայերը, որ նրանք են սկսել բռնագաղթերն ու սպանությունները:

Նա ավելացնում է, որ Սումգայիթի դեպքերին հետևեցին Բաքվի դեպքերը, Ղարաբաղի դեպքերը: Հայերը փորձեցին առանձնանալ Ադրբեջանից՝ նվաճելով ադրբեջանական պատմական հողերը:

Հ.Գ Պրոխարովի այս խոսքերից Բաքվի նավթային դոլարների հոտն է գալիս: Որպես ապացույց՝ կարելի է բերել նրա այն խոսքը, որ Ադրբեջանի Կենտկոմի երկրորդ քարտուղարից ստացել է ավտոմեքենա: Նաև ներկայացնում է ծովի ափին վերջինիս «արքունիքում» տեղի ունեցած իրենց հանդիպումը: Գուցեև հենց այդ ալիքների տակ են ստեղծվել նրա այս հակահայկական մտքերը:

Աղասի Առաքելյան