Սիրիայից գաղթած քսան բժիշկ արդեն աշխատանք ունի

Սիրիայից գաղթած բժիշկները հանդիպել են ՀՀ առողջապահության նախարար Դերենիկ Դումանյանի հետ: Քննարկման հիմնական թեման է եղել բժիշկների' աշխատանքի տեղավորման հարցը։ Հանդիպմանը ներկա են եղել գրեթե բոլորը' մոտ 50 բժիշկ, որոնցից 20-ն արդեն ապահովվել է աշխատանքով։

Քննարկման ընթացքում բժիշկներից մեկը համաձայնել է աշխատել մոտակա մարզում։ Մի քանի ստոմատոլոգների և երկու դեղագետի ևս կոնկրետ աշխատանք է առաջարկվել։ Որոշ առաջատար մասնագետներ էլ ցանկություն են հայտնել զբաղվել նաև դասախոսական աշխատանքով' ինչպես Երևանի Մ. Հերացու անվան պետական բժշկական համալսարանում, այնպես էլ' ՀՀ առողջապահության նախարարության ենթակայության բժշկական քոլեջներում։

«Հանդիպման ընթացքում բարձրացված հարցերին մոտ օրերս լուծում կտրվեն, և բոլոր մասնագետներին աշխատանք կառաջարկվի»,- վստահեցրել է նախարարը:

Սիրիահայ բժիշկների խնդրանքով յուրաքանչյուր ամսվա առաջին շաբաթ օրը պարբերաբար հանդիպումներ կկազմակերպվեն նախարարի հետ։