ՆԳՆ շրջիկ սպասարկման գրասենյակները հոկտեմբերի 30-ին և 31-ին կգործեն Սյունիքի, Վայոց ձորի, Կոտայքի և Արմավիրի համայնքներում

Ներքին գործերի նախարարության սպասարկման գրասենյակները շարունակում են իրականացնել շրջիկ սպասարկում՝ քաղաքացիներին մատուցելով ինչպես միգրացիայի և քաղաքացիության ծառայության, այնպես էլ հաշվառման-քննական բաժինների ծառայություններ։ ՆԳ նախարարի հրամանով հոկտեմբերի 30-ին և 31-ին շրջիկ սպասարկման գրասենյակները քաղաքացիներին կտրամադրեն մի շարք ծառայություններ Սյունիքի մարզի Քաջարան համայնքում, համայնքապետարանի հարևանությամբ, Վայոց ձորի մարզի Վայք համայնքում, համայնքապետարանի հարևանությամբ, Սյունիքի մարզի Գորայք համայնքում, համայնքապետարանի հարևանությամբ։

Շրջիկ սպասարկման ընթացքում քաղաքացիները կարող են փոխանակել անձնագիր, ստանալ ժամանակավոր պաշտպանության վկայական կամ տեղեկանքներ, տեղահանված անձինք՝ ներկայացնել ՀՀ քաղաքացիություն ստանալու դիմումներ, փոխանակել կամ վերականգնել վարորդական իրավունք, սեփականության վկայական կամ հաշվառման վկայագիր, ինչպես նաև օգտվել հաշվառման-քննական բաժինների կողմից մատուցվող այլ ծառայություններից։

Բացի այդ, հոկտեմբերի 30-ին շրջիկ սպասարկման գրասենյակները կլինեն նաև Կոտայքի մարզի Չարենցավան և Արմավիրի մարզի Արագած համայնքներում՝ հոկտեմբերի 23-ին ընդունված դիմումների շրջանակներում փաստաթղթերը հանձնելու նպատակով։