Արսեն Թորոսյանը՝ թոշակի բարձրացման մասին․ «Այս պահի դրությամբ ավելին հնարավոր չէ»

ԱՍՀ նախարար Արսեն Թորոսյանը կարծում է, որ կենսաթոշակային կամ նպաստային քարտերի միջոցով ապրանքների և ծառայությունների ձեռքբերման դիմաց անկանխիկ եղանակով վճարումներից հետվճարի տրամադրման ծրագիրը մի քանի խնդիրներ է լուծել։

«Այն երկու նպատակ ունի, ինչպես գիտեք, և մենք պատահական չէ, որ խոսում ենք հենց այս գործիքով մեր քաղաքացիների նպաստները և կենսաթոշակները բարձրացնելու մասին, որովհետև այդ կենսաթոշակները և, ընդհանրապես, բյուջեն գոյանում են մեծամասամբ հարկային եկամուտներից, իսկ հարկերը գոյանում են մեր տնտեսվարողների կողմից վճարած հարկերից, դրանք էլ գոյանում են ոչ ստվերային շրջանառությունից, ի տարբերություն՝ ստվերայինի, երբ որ հարկեր չեն վճարվում, և մենք այս գործիքներով փորձում ենք նաև բերել ստվերը սպիտակ դաշտ, դրանով հարկելով գործարքները և ավելացնելով պետական բյուջեի մուտքերը»,– ասաց նա:

Նախարարը նաև հիշեցրեց 2%-ի չափով համընդհանուր հետվճարի ծրագրի մասին՝ նշելով, որ այդ 2%–ը փոքր թիվ չէ, եթե համադրում ենք ծրագրված 20%-ի հետ․

«Այս պահի դրությամբ հետվճարի չափը կազմում է 12% և առավելագույնը՝ 6000 դրամ, և մենք պլանավորում ենք բարձրացնել այդ հետվճարը 20%-ի չափ և առավելագույնը 10000 դրամի սահմաններում և եթե գումարում ենք նաև այս 2%-ը, ըստ էության, դառնում է 22%:

Մենք այս պահի դրությամբ ունենք մոտ 350 քաղաքացի, որ օգտվում է այս ծրագրից և մենք խրախուսում ենք, որ ավելի շատ թվով քաղաքացիներ օգտվեն դրանից և մեր կանխատեսումներով մյուս տարվա վերջին այդ քաղաքացիների թիվը կկազմի մոտավորապես 410-420000 և միջին հետվճարի չափն էլ կլինի մոտավորապես 3-ից 4000 դրամի չափով՝ ավելին, քան այսօր է»։

Թորոսյանի կարծիքով՝ հետվճարով կենսաթոշակը կմոտենա սպառողական զամբյուղի մոտ 90%-ին, ինչը, նրա խոսքով, բավարար չէ ամբողջությամբ սպառողական զամբյուղին հասնելու համար․ «Պարզ է, որ 10%–ով ավելի ցածր է, սակայն մեծ քայլ է»,– ասաց ԱՍՀ նախարարը։

Անդրադառնալով Ֆինանսների նախարար Վահե Հովհաննիսյանի այն հայտարարությանը, որ «եթե կենսաթոշակները բարձրացնենք, ապա ոչ միայն կենսաթոշակառուները վատ կապրեն, այլև բոլորս վատ կապրենք», նա նշել է՝ գործընկերոջ խոսքերը մանիպուլացվում են։

«Ամենևին դրա մասին չի եղել խոսքը, հարգելի գործընկերներ, սիրելի հայրենակիցներ, այլ նրա մասին է, որ մեր ֆիսկալ հնարավորությունները թույլ են տալիս բարձրացնել այսքան և այս եղանակով, որը կարծում ենք այս պահի դրությամբ ավելին հնարավոր չէ։ Սա նաև գործիք է, որը խթանելու է հավելյալ հարկերի հավաքագրումը»,– ասել է Թորոսյանը։