Ինչպես համոզել ալկոհոլիկին բուժվել․ նարկոլոգի խորհուրդները

Ալկոհոլիզմից տառապող հարազատին համոզել բուժում սկսել հնարավոր է, բայց ոչ սպառնալիքներով կամ ուլտիմատումներով։ Այդ մասին «Лента.ру»-ի հետ զրույցում նշել է բժշկական գիտությունների թեկնածու, նարկոլոգ Նիկոլայ Չերեդնիչենկոն՝ բացատրելով, թե ինչպես ճիշտ խոսել նման մարդու հետ։

Բժշկի խոսքով՝ ամենակարևորն այն է, որ զրույցը լինի հանգիստ և փաստարկված․ «Պետք է հավաքել փաստեր՝ երբ նա երևացել է հարբած, ում է գումար պարտք, ինչ անհարմարություններ է առաջացրել ընտանիքի համար։ Դա մեղադրանք չէ, այլ իրականություն, որը նա պետք է տեսնի կողքից», — նշել է մասնագետը։ Նա ընդգծել է, որ ցանկացած ճնշում առաջացնում է դիմադրություն, ուստի նման զրույցը պետք է սկսել միայն այն ժամանակ, երբ մարդը սթափ և համեմատաբար հավասարակշռված է։

Չերեդնիչենկոն հավելել է․ «Ձեր նպատակը նրան նվաստացնելը չէ, այլ ցույց տալը, թե որքան է տարբեր այն մարդը, ով նա իրականում է, և այն, ինչ դառնում է ալկոհոլի ազդեցության տակ։ Դուք չեք կարող նրան ուժով տանել բժշկի մոտ, բայց կարող եք առաջարկել օգնություն, որպեսզի ինքը փորձի դուրս գալ այն փոսից, ուր արդեն ներքաշել է բոլորին, ովքեր նրան սիրում են»։