Մարադոնան գիտակցում էր Սիմոնյանի մեծությունը․ ԱԱ-2018-ի վարողի հուզիչ հիշողությունը

Ռուսաստանում կայացած Աշխարհի 2018 թվականի առաջնության վիճակահանության վարող, մարզական լրագրող Մարիա Կոմանդնայան անդրադարձել է լեգենդար Նիկիտա Սիմոնյանի մահվանը՝ կիսվելով արգենտինացի աշխարհահռչակ ֆուտբոլիստ Դիեգո Մարադոնայի և Սիմոնյանի հանդիպման մասին հուզիչ դրվագով։

Կոմանդնայան սոցցանցերում հիշել է վիճակահանության արարողության ժամանակ տեղի ունեցածը, երբ Սիմոնյանի ձեռքից պատահաբար ընկել էր գնդակը, իսկ Մարադոնան անմիջապես շտապել էր օգնության։

«Հանգչեք խաղաղությամբ, Նիկիտա Պավլովիչ… Այս լուսանկարում աջից Մարադոնան է։ Երբ ընթանում էր Աշխարհի առաջնության վիճակահանությունը, Նիկիտա Պավլովիչի ձեռքից մի պահ ընկավ գնդակը։ Եվ Մարադոնան նետվեց նրան օգնելու։ Ինձ թվում է՝ նա գիտակցում էր Սիմոնյանի մեծությունը, դա զգացվում էր», — գրել է Կոմանդնայան։

Հաղորդավարուհին նաև իր հիացմունքն է հայտնել Սիմոնյանի աշխատասիրության և ֆուտբոլի հանդեպ նվիրվածության վերաբերյալ.

«Ինձ համար բացարձակ շոկ է, որ Նիկիտա Պավլովիչը գրեթե ամեն օր գնում էր աշխատանքի ՌՄ (Ռուսաստանի ֆուտբոլային միության) գրասենյակ… Ինչպե՜ս պետք է սիրել սեփական գործը, սիրել ֆուտբոլը… 1956 թվականի Օլիմպիական չեմպիոն։ Միայն պատկերացրեք։ Նա ապրող օլիմպիական չեմպիոններից ամենատարեցն էր։ Հեռացավ 99 տարեկանում… Լեգենդ»։

Նիկիտա Սիմոնյանը մահացել է կիրակի՝ նոյեմբերի 23-ին, 99 տարեկանում։ Նա «Սպարտակի» պատմության լավագույն ռմբարկուն էր, 1956 թ. օլիմպիական չեմպիոն, ԽՍՀՄ քառակի չեմպիոն (որպես խաղացող) և եռակի չեմպիոն (որպես մարզիչ)։ 1992 թվականից զբաղեցնում էր ՌՖՄ առաջին փոխնախագահի պաշտոնը։

Դիեգո Մարադոնան կյանքից հեռացել է 2020 թվականի նոյեմբերի 25-ին՝ 60 տարեկանում։