Կրեմլ. ԱՄՆ խաղաղության պլանի բազմաթիվ դրույթներ ընդունելի են Ռուսաստանի համար

Ռուսաստանի նախագահի միջազգային հարցերի օգնական Յուրի Ուշակովը հայտարարել է, որ Ալյասկայում քննարկված ԱՄՆ խաղաղության պլանի մի շարք կետեր համարվում են ընդունելի Մոսկվայի համար։ Ինչպես փոխանցում է ՏԱՍՍ–ը, Ուշակովը նշել է, որ Մոսկվան արդեն ծանոթացել է պլանի այն տարբերակին, որը «համապատասխանում է Ալյասկայում ձեռք բերված ըմբռնումներին»։

Միևնույն ժամանակ, նա ընդգծել է, որ Ռուսաստանը ծանոթացել է նաև եվրոպական խաղաղության նախագծին, սակայն այն «բացարձակապես չի համապատասխանում» Մոսկվայի դիրքորոշմանը։ ԱՄՆ մշակած պլանը, ըստ Ուշակովի, նույնպես պահանջում է մանրակրկիտ քննարկում և իրավական հստակեցում։

Ավելի վաղ Ուշակովը նշել էր, որ Ուկրաինայի շուրջ պատրաստվող խաղաղության փաստաթուղթը պետք է վերամշակվի բոլոր կողմերի՝ Ռուսաստանի, Ուկրաինայի, ԱՄՆ–ի և եվրոպական պետությունների մասնակցությամբ՝ հաշվի առնելով հարցի «ծայրահեղ լրջությունը»։