Ռուսաստանը կոշտ է արձագանքում․ Մոսկվան չի համաձայնի իր սառեցրած ակտիվների օգտագործմանը

Ռուսաստանը չի տա որևէ համաձայնություն իր սառեցրած ակտիվների օտարման հարցում, հայտարարել է ՌԴ Պետդումայի տնտեսական քաղաքականության կոմիտեի նախագահի տեղակալ Արտյոմ Կիրյանովը։ Դեպուտատը «Лента.ру»-ի հետ զրույցում ընդգծել է, որ եվրոպական նախաձեռնությունները ոչ միայն անիրագործելի են, այլև խորացնում են ԵՄ–Ռուսաստան արդեն լարված հարաբերությունները։

Եվրոպական հանձնաժողովը նախկինում հայտնել էր, որ ԵՄ երկրները շարունակում են քննարկել սառեցրած ռուսական ակտիվները որպես «վերականգնման վարկի» հիմք օգտագործելու գաղափարը՝ աջակցելու Ուկրաինային։ Կիրյանովի խոսքով, այս մոտեցումը ցույց է տալիս, որ ԵՄ–ն դուրս չի գալիս ճգնաժամի կառավարման տրամաբանությունից և փոխարենը բարձրացնում է Ռուսաստանի հետ առճակատման մակարդակը։ Նա նշել է, որ այս գործընթացում երևում է նաև ԵՄ–ԱՄՆ հարաբերությունների սրացում։

Կիրյանովը հավելել է, որ եվրոպական երկրների մեծ մասը, ամենայն հավանականությամբ, պատրաստ չէ աջակցել ռուսական ակտիվների նկատմամբ նման քայլերի։ Financial Times–ը ավելի վաղ հրապարակել էր, որ ռուսական ակտիվներով Ուկրաինային ֆինանսավորելու եվրոպական փաթեթը կանգ է առել՝ կապված ԱՄՆ նախագահ Դոնալդ Թրամփի վարչակազմի նոր խաղաղության պլանի հետ։