«Աղոթքի նախաճաշը», ձերբակալություններ և պաշարված եկեղեցի. Religion Unplugged-ն անդրադարձել է Հայաստանի ներքաղաքական կյանքին

Համաշխարհային Մամուլ 25 Նոյեմբեր, 2025 0:10

Կրոնական թեմաների լուսաբանման մեջ մասնագիտացված «Religion Unplugged» լրատվական կազմակերպությունը «Հայաստանի «Աղոթքի նախաճաշի» հետևում. ձերբակալություններ և պաշարված եկեղեցի» վերտառությամբ հոդված է հրապարակել։

Հոդվածի հեղինակ Վիշալ Առորան վերլուծել է 2025 թվականի նոյեմբերի 15-ին Երևանում կայացած «Աղոթքի նախաճաշ» միջոցառումը՝ ընդգծելով միջոցառման ընթացքում տիրող «խաղաղության» մթնոլորտի և երկրում տեղի ունեցող քաղաքական ու կրոնական հետապնդումների միջև առկա կտրուկ հակասությունները։

Նշվում է, որ վարչապետ Նիկոլ Փաշինյանը ելույթ է ունեցել՝ խոսելով «խաղաղության» մասին, մինչդեռ նրա կառավարությունը թիրախավորում էր Հայ Առաքելական Եկեղեցին։ Միջոցառմանը բացակայում էին Հայաստանյան թեմերի բարձրաստիճան հոգևորականները, և ներկա արտասահմանյան հյուրերից (հիմնականում ԱՄՆ ավետարանչականներ) ոչ ոք չբարձրացրեց նրանց բացակայության կամ հոգևորականների կալանավորման հարցը։

Հոդվածը մեղադրում է կառավարությանը ՀԱԵ դեմ հետապնդումներ իրականացնելու մեջ՝ հատկապես այն բանից հետո, երբ եկեղեցին քննադատել է կառավարությանը Արցախի կորստի համար։

Հեղինակը նաև գրել է, որ կալանավորվել են երկու ընդդիմադիր փոդքասթերներ՝ Վազգեն Սաղաթելյանն ու Նարեկ Սամսոնյանը։

««Իմնեմնիմի» փոդքասթի հաղորդավարներ Վազգեն Սաղաթելյանը և Նարեկ Սամսոնյանը ձերբակալվել են նոյեմբերի 10-ին Ազգային ժողովի խոսնակ Ալեն Սիմոնյանի մասին թողարկման մեջ արված մեկնաբանությունների համար։ Իշխանությունները նրանց մեղադրել են «խուլիգանության» մեջ՝ պնդելով, որ նրանք օգտագործել են վիրավորական խոսք և սպառնալիքներ են հնչեցրել։ Նրանց փաստաբանները մեղադրանքները անվանել են անհիմն և նշել քաղաքական դրդապատճառներ։ Սաղաթելյանի շահերը ներկայացնող Արսեն Բաբայանը նշել է, որ իշխող «Քաղաքացիական պայմանագիր» կուսակցությունն օգտագործում է գործը՝ քննադատներին լռեցնելու համար։ Նա հղում է կատարել պատգամավոր Հայկ Կոնջորյանի տեսանյութին, որը կասկածի տակ էր դրել, թե արդյոք կոպիտ լեզուն պետք է ընդունելի լինի քաղաքական բանավեճում», - գրված է հոդվածում։

Հոդվածում նշվում է, որ արդարադատության նախարարությունը մերժել է Christian Solidarity International իրավապաշտպան խմբի խնդրանքը՝ այցելելու կալանավորված չորս հոգևորականներին։

Հոդվածում նշվում է, որ կալանավորվածների թվում է նաև գործարար և եկեղեցու բարերար Սամվել Կարապետյանը։ Նրա հանցանքը եկեղեցու պաշտպանությունն էր։