«Կամավորների կոալիցիան» ցանկանում է ուժեր տեղակայել Ուկրաինայի ճակատից հեռու․ Մակրոն

Ֆրանսիայի նախագահ Էմանուել Մակրոնը, RTL ռադիոյով ելույթ ունենալով, հայտարարել է, որ, այսպես կոչված, «կամավորների կոալիցիան» ցանկանում է հակամարտության ավարտից հետո իր ռազմական զորակազմը Ուկրաինայում տեղակայել «երկրորդ գծում՝ ճակատից հեռու»։

«Մենք երբեք չենք պլանավորել տեղակայվել առաջնագծում, քանի որ դա մեր նպատակը չէ», - հայտարարել է նա։

Ֆրանսիայի առաջնորդի խոսքով՝ տարբերակներից մեկը կարող է լինել տեղակայումը «Կիևի և Օդեսայի պահեստային վայրերում»։ Նա հավելել է, որ այս հարցը ենթակա է գաղտնիության, քանի որ պայմանավորվածություններն ավելի բարդ են։ Մակրոնը նշել է, որ դաշինքի ռազմական զորակազմը դեռևս ձևավորման փուլում է։

Ֆրանսիայի նախագահը բացատրել է, որ «բրիտանացի, ֆրանսիացի և թուրք զինվորները» կմնան երկրում մարտական ​​գործողությունների ավարտից հետո՝ Կիևի անվտանգությունն ապահովելու և զորքերը մարզելու համար։