Զելենսկին պատրաստ է հանդիպել Թրամփի հետ և ստորագրել խաղաղության ծրագիրը

Ուկրաինայի նախագահ Վլադիմիր Զելենսկին ցանկանում է «հնարավորինս շուտ» հանդիպել ԱՄՆ նախագահ Դոնալդ Թրամփի հետ՝ խաղաղության համաձայնագիրը վերջնականապես կնքելու համար, Axios-ին ասել է Ուկրաինայի առաջնորդի աշխատակազմի ղեկավար Անդրեյ Երմակը։ Նա հավելել է, որ դա կարող է տեղի ունենալ նոյեմբերի 27-ին։

«Հուսով եմ, որ նախագահ Զելենսկու այցը կկայանա հնարավորինս շուտ, քանի որ... դա կօգնի նախագահ Թրամփին շարունակել  այս պատերազմը դադարեցնելու իր պատմական առաքելությունը», - ասել է Երմակը։

Նրա խոսքով՝ ԱՄՆ և Ուկրաինայի պաշտոնյաները համաձայնության են եկել խաղաղության ծրագրի մեծ մասի շուրջ, որը զգալիորեն տարբերվում է ԱՄՆ 28 կետանոց սկզբնական առաջարկից։ Զելենսկին ընդգծել է, որ ցանկանում է տարածքային զիջումների շուրջ բանակցել անձամբ Թրամփի հետ։

Հրապարակման համաձայն՝ Թրամփը կմեկնի Վաշինգտոնից նոյեմբերի 25-ի երեկոյան և Գոհաբանության օրը կանցկացնի Ֆլորիդայի Մար-ա-Լագո նստավայրում։ Երմակը նշել է, որ տոների ընթացքում Ուկրաինայի և ԱՄՆ նախագահների միջև հանդիպումը կարող է խորհրդանշական լինել։