Այսօր ազատազրկման վայրերում գտնվում է հայության հավաքական կերպարը. Վահե Գրիգորյան

«Այսօր ազատազրկման վայրերում գտնվում է հայության հավաքական կերպարը, նկատի ունեմ քաղբանտարկյալներին»,-«ՀՀ-ում առկա քաղբանտարկյալների և նրանց խախտված իրավունքների վերականգնման» մասին հայտարարության հիմքով հրավիրված  ԱԺ հանրային լսումներին ասաց իրավաբան Վահե Գրիգորյանը։

Նրա խոսքով՝ Միքայել սրբազանը հանդիսանում է Հայաստանում բնակվող այն երկու ընտանիքներից մեկի ուղիղ ներկայացուցիչը, ում նախնիները պաշտոնապես այլ պետությունների կողմից ճանաչված են եղել որպես Հայաստանի թագավորներ։

«Հետևաբար, Միքայել Սրբազանի թե՛ կենսագրությունը, թե՛ անցած ճանապարհը, թե՛ գործունեությունը, թե՛ անգամ ծագումնաբանությունը, ուղղակիորեն կապված է մեր ազգային ինքնության հետ և նրա ու մյուսների անազտույան մեջ գտնվելը հայության ինքնության բանտարկելն է, որպեսզի այդ ինքնությունը չկարողանա արթնանալ»,- ասաց Գրիգորյանը։

Իրավաբանը նշեց, որ քաղբանտարկյալների թեման արդիական է դարձել նրա համար, որ գործող իշխանությունները սկսել են հակասել հենց իրենք իրենց։

 «Դատական ակտերով հավաքների ազատությունն ամենաշատը սահմանափակվել է այս իշխանության օրոք»,- ասաց Գրիգորյանը՝ հիշեցնելով, որ ներկա կառավարիչները հավաքներով են եկել իշխաանության և բերեց Ռուբեն Մխիթարյանի օրինակը, որը հավաքներին ձեռքերը վերև պարզած լինելու համար գտնվել է անազատության մեջ։

 Իրավաբանը նաև հիշեցրեց, որ ռազմական դրության ժամանակ էլ ոչ իրավաչափ ձևով սահմանափակված էին հավաքների ազատությունը։

Վահե Գրիգորյանը նշեց, որ Ավետիք Չալաբյանը և Գերասիմ Վարդանյանը նույնպես կալանավորվել են։

նա հայտարարեց, որ իշխանությունները Վենետիկի հանձնաժողովից դրական եզրակացություն են կորզել  հավաքներին նյութապես շահագրգռելու միջոցով ներգրավելու դրույթի վերաբերյալ և այն դարձրել են մահակ ընդդիմախոսների դեմ։

«Հարգելի քաղաքացիներ, քաղաքական և հասարակական գործիչներ, այդ քաղբանտարկյալներից յուրաքանչյուրը կարող եք լինել դուք և այս իշխանության օրոք բացառված չէ, որ հաջորդը կլինեք դուք և գոնե  միայն քաղբանտարկյալների հարցում ձեր միավորումն է, որ  կարող է ազատել նրանց գերությունից և հետագայում բացառել ձեր քաղբանտարկյալ դառնալը»,- հայտարարեց Վահե Գրիգորյանը։