Դեդ Հասանի սպանության մեջ խառն է Ռուսաստանում վրացական քրեական կլանի մա՞տը

Մոսկվայի կենտրոնում քրեական հեղինակություն Ասլան Ուսոյանի սպանության հետ կապված գերմանական մի շարք պարբերականներում լույս են տեսել հոդվածներ «ռուսական մաֆիայի թագավորի» և նրա սպանության հետևանքների մասին: 

Ինչպես գրում է Die Welt պարբերականի լրագրող Յուլիա Սմիրնովան, Ասլան Ուսոյանի սպանությունը մեզ հիշեցնում է 1990-ականները պատվիրված սպանությունները: Հոդվածում նշվում է, որ «օրենքով գող» 75 տարեկան Դեդ Հասանը իր քրեական գործունեությունը սկսել է 1956 թվականին և այս ընթացքում վիթխարի քրեական իմպերա էր ստեղծել, որը եկամուտներ ուներ անօրինական կազինոյի, զենքի և թմրամիջոցի վաճառքի բիզնեսից: Դեդ Հասանը սպանվեց հունվարի 16-ին Մոսկվայի կենտրոնում:

Քրեական հեղինակության վրա սա առաջին մահափորձը չէր: 2010 թվականին արդեն տեղի էր ունեցել մահափորձ, որի ընթացքում Դեդ Հասանը ծանր վիրավորվել էր: Մահափորձից հետո ոստիկանության կողմից կեղծ լուր էր տարածել, որ Դեդ Հասանը սպանվել է, որի միջոցով ցանկանում էին ճշտել, թե ով է պատվիրողը: Մահափորձից հետո Ուսոյանը տեղաշարժվում էր միայն ծանր պահակազորի, նաև չորս զրահապատ ավտոմեքենաների ուղեկցությամբ:  

Հոդվածի խմբագիրը, հղում կատարելով ռուսական ԶԼՄ-ներին, նշում է, որ սպանությունը Սոչիի օլիմպիական խաղերի հետ է կապված: 2011 թվականին Դեդ Հասանը կռվի մեջ էր Ջեմմա Միքելադզեի խմբավորման հետ, որին նա «թագազրկել էր»: 

Tageszeitung գերմանական պարբերականը նշել էր, որ Դեդ Հասանի սպանության հետևում կանգնած է մաֆիոզ Թարիել Օնիանին՝ Թարո մականունով, որը մահափորձ էր կատարել 2008 թվականին: Ըստ նրա՝ սպանության մեջ գուցե մեղավոր է եղել Ռուսաստանում վրացական քրեական կլանը: