ԱՄՆ-ում ներկայացրել են վեցերորդ սերնդի ինքնաթիռների հիմնական պահանջները

Վեցերորդ սերնդի մարտական ինքնաթիռները պետք է ունենան ադապտիվ շարժիչներ և կարողանան ղեկավարել ուղեկցող անօդաչու թռչող սարքեր․ գրում է ամերիկյան The National Interest հանդեսը՝ հղում անելով ռազմական վերլուծաբան Հարիսոն Քասին։ Նրա խոսքով՝ ապագայի կործանիչները պարտադիր պետք է ինտեգրված լինեն ցանցակենտրոն մարտական համակարգերի մեջ և համագործակցեն «վստահված» դրոնների հետ՝ որպես մեկ միասնական հարթակ։

Քասի գնահատմամբ՝ առանցքային դեր կխաղան ադապտիվ շարժիչները, որոնք կթույլատրեն թռիչքի ընթացքում անցում կատարել բարձր արագության և վառելիքի խնայող ռեժիմների միջև։ Բացի այդ, վեցերորդ սերնդի ինքնաթիռներից ակնկալվում են ընդլայնված ստելս հնարավորություններ՝ թշնամու ռադիոլոկացիոն համակարգերից առավել արդյունավետ թաքնվելու համար։ Ըստ հեղինակի՝ տեխնոլոգիական արդյունավետության վրա կենտրոնացումը աստիճանաբար կզիջի տեղը տեղեկատվական գերազանցությանը։

Հոդվածում ընդգծվում է նաև օդաչուի դերի փոփոխությունը․ նա այլևս չի լինի միայն օդային մարտի մասնագետ, այլ կդառնա ամբողջական առաքելության հրամանատար, որի գոյատևումը կախված կլինի իրավիճակային իրազեկվածությունից և ցանցային խոր ինտեգրումից։ Քասի կարծիքով՝ վեցերորդ սերնդի ինքնաթիռ ստեղծելուն առավել մոտ են ԱՄՆ-ը և Չինաստանը։ Միաժամանակ հիշեցվում է, որ դեկտեմբերին ռուսական «Ростех»-ի ղեկավար Սերգեյ Չեմեզովը հայտարարել էր՝ ռուսական հինգերորդ սերնդի կործանիչները հատուկ ռազմական գործողության ընթացքում հաջողությամբ շրջանցում են հակառակորդի ռադիոլոկացիոն կայանները։