Իրանում բողոքի ակցիաների ընթացքում զոհերի թիվը հասել է առնվազն 5 հազարի

Իրանի պաշտոնյաներից մեկը Reuters-ին հայտնել է, որ երկրում տեղի ունեցած բողոքի ցույցերի ընթացքում հաստատված զոհերի թիվը հասել է առնվազն 5 000-ի, այդ թվում՝ մոտ 500 անվտանգության ուժերի ներկայացուցիչ։ Նրա խոսքով՝ զոհերի մահվան համար պատասխանատու են «ահաբեկիչներն ու զինված անկարգարարները», որոնք, ըստ պաշտոնական դիրքորոշման, սպանել են «անմեղ իրանցիների»։

Պաշտոնյան նշել է, որ ամենածանր բախումներն ու զոհերի ամենամեծ թիվը գրանցվել են Իրանի հյուսիս-արևմուտքում գտնվող քրդաբնակ շրջաններում, որտեղ նախկինում ևս արձանագրվել են բռնի բախումներ՝ քրդական անջատողական խմբերի ակտիվության պատճառով։ Նա հավելել է, որ վերջնական զոհերի թիվը, հավանաբար, կտրուկ չի աճի, իսկ ցույցերի մասնակիցներին, ըստ նրա, աջակցել և զինել են Իսրայելը և արտերկրում գործող զինված խմբերը։

Մինչդեռ ԱՄՆ-ում տեղակայված HRANA իրավապաշտպան կազմակերպությունը հայտարարել է, որ իր տվյալներով զոհերի թիվը կազմում է 3 308, ևս 4 382 դեպք գտնվում է ստուգման փուլում, իսկ ձերբակալվածների թիվը գերազանցում է 24 000-ը։ Նորվեգիայում գործող իրանական քրդական իրավունքների պաշտպանության Hengaw կազմակերպությունն էլ հայտնել է, որ դեկտեմբերին խստացված անվտանգության միջոցառումներ են կիրառվել հատկապես հյուսիս-արևմտյան քրդաբնակ շրջաններում։