Իրանի սահմաններից դուրս գտնվող իրանցիներին պատել են վախն ու անորոշությունը՝ բողոքի ալիքի ֆոնին

Իրանի արտերկրում բնակվող իրանցիները խոր անհանգստությամբ հետևում են հայրենիքում տեղի ունեցող իրադարձություններին՝ զանգվածային բողոքի ցույցերի և ինտերնետի անջատման պայմաններում չկարողանալով կապ հաստատել ընտանիքների հետ։ Al Jazeera-ի փոխանցմամբ՝ հունվարի 8-ից հետո, երբ իշխանությունները փակել են համացանցը, սփյուռքում ապրող բազմաթիվ իրանցիներ օրեր շարունակ որևէ տեղեկություն չեն ստանում իրենց հարազատների վիճակի մասին։

Բողոքները սկսվել են դեկտեմբերի վերջից՝ ազգային արժույթի՝ ռիալի կտրուկ արժեզրկումից հետո և արագորեն տարածվել ողջ երկրով մեկ։ Իրանի գերագույն առաջնորդ Ալի Խամենեին ընդունել է, որ անկարգությունների ընթացքում զոհվել են «մի քանի հազար» մարդ՝ մեղադրելով ԱՄՆ-ին և Իսրայելին լարվածության սրման մեջ։ Իշխանությունները խոստովանել են սոցիալ-տնտեսական ծանր պայմանների առկայությունը, սակայն միաժամանակ հայտարարել են, որ ցույցերի մի մասը վերածվել է բռնության՝ արտաքին ուժերի աջակցությամբ։

Սփյուռքի ներկայացուցիչների խոսքով՝ անորոշությունն ու սպասումը դարձել են առօրյայի անբաժան մաս։ Տնտեսական ճգնաժամը, բարձր գնաճը և երկարամյա պատժամիջոցները, նրանց գնահատմամբ, ստեղծել են մի իրավիճակ, որը տարբերվում է նախորդ բողոքի ալիքներից և կարող է խորքային փոփոխությունների հանգեցնել։ Սակայն շատերը նաև վախենում են, որ նույնիսկ քաղաքական փոփոխությունների դեպքում երկիրը դեռ երկար կմնա ծանր սոցիալ-տնտեսական ճգնաժամի մեջ՝ ուժերի սուր պայքարի պայմաններում։