Թրամփը Դավոս է մեկնել այլ ինքնաթիռով՝ Air Force One-ի տեխնիկական խնդրի պատճառով

ԱՄՆ նախագահ Դոնալդ Թրամփը մեկնել է Շվեյցարիայի Դավոս քաղաք՝ մասնակցելու Համաշխարհային տնտեսական ֆորումին, սակայն թռիչքը տեղի է ունեցել պահուստային օդանավով։ Ինչպես հայտնում է CNN-ը, նախագահական Air Force One ինքնաթիռում թռիչքից կարճ ժամանակ անց հայտնաբերվել է էլեկտրական համակարգի անսարքություն, ինչի պատճառով ինքնաթիռը ստիպված վերադարձել է Մերիլենդի Էնդրյուս ռազմաբազա։

Սկզբնապես Թրամփը պետք է Դավոս մեկներ Boeing VC-25 ինքնաթիռով, որը Boeing 747-ի ռազմական, հատուկ փոփոխված տարբերակն է։ Սակայն առաջացած տեխնիկական խնդրից հետո նախագահը շարունակել է ճանապարհը Boeing C-32A օդանավով՝ ԱՄՆ ռազմաօդային ուժերի կողմից օգտագործվող Boeing 757 երկշարժիչ ինքնաթիռով։

Սպիտակ տան մամուլի քարտուղար Քերոլայն Լևիթը նշել է, որ խոսքը «փոքր խնդիրի» մասին է եղել, որը կապված է եղել էլեկտրական համակարգի հետ։ Մինչ այդ, Financial Times-ը տեղեկացրել էր, որ այս տարվա Դավոսի համաժողովը կարող է լարված քննարկումների հարթակ դառնալ Թրամփի և եվրոպական երկրների միջև՝ հատկապես Գրենլանդիայի կարգավիճակի շուրջ առկա տարաձայնությունների ֆոնին։