Bloomberg-ը բացահայտել է Թրամփի հատուկ կարգավիճակը «Խաղաղության խորհրդում»

ԱՄՆ նախագահ Դոնալդ Թրամփը կարող է պահպանել նախագահողի պաշտոնը ԱՄՆ-ի նախաձեռնությամբ ձևավորվող «Խաղաղության խորհրդում» նույնիսկ նախագահական ժամկետի ավարտից հետո։ Այդ մասին հայտնում է Bloomberg գործակալությունը՝ հղում անելով բարձրաստիճան ամերիկացի պաշտոնյայի։

Ըստ սահմանված կանոնների՝ խորհրդի նախագահի պաշտոնը կպահպանվի Թրամփի մոտ մինչև նրա պաշտոնական հրաժարականը։ Դրանից հետո ԱՄՆ նոր նախագահը կկարողանա նշանակել երկրի պաշտոնական ներկայացուցչին այդ մարմնում։ Bloomberg-ի գնահատմամբ՝ նման ձևաչափը Թրամփին փաստացի հնարավորություն է տալիս երկարաժամկետ, նույնիսկ ցմահ ազդեցություն պահպանել կառույցի վրա։

Գործակալությունը նշում է, որ այս հանգամանքը լրացուցիչ բարդություններ է ստեղծում «Մեծ յոթնյակի» (G7) առաջնորդների համար։ Ավելի վաղ հաղորդվել էր նաև, որ Եվրամիության մի շարք երկրներ մտադիր չեն միանալ ԱՄՆ-ի կողմից առաջ քաշվող «Խաղաղության խորհրդին», որը նախատեսվում է ներգրավել Գազայի հատվածի կառավարման հարցում։ Եվրոպական պետությունները մտահոգված են, որ նախաձեռնությունը կարող է թուլացնել ՄԱԿ-ի դերը, ինչպես նաև դժգոհություն է առաջացրել խորհրդում Ռուսաստանի նախագահ Վլադիմիր Պուտինի հնարավոր ներգրավումը։