Կիևը հայտնել է Ադրբեջանի կողմից ցուցաբերված աջակցության մասին

Ադրբեջանը մարդասիրական և տեխնիկական աջակցություն է ցուցաբերել Ուկրաինային։ Այդ մասին հայտնել է Ուկրաինայի արտաքին գործերի նախարար Անդրեյ Սիբիգան՝ մեկնաբանությունը հրապարակելով նախարարության պաշտոնական Telegram-ալիքում։

Նրա խոսքով՝ Ադրբեջանը Ուկրաինա է ուղարկել էներգետիկ ենթակառուցվածքների համար նախատեսված սարքավորումներ, այդ թվում՝ 12 ցածր լարման վահանակ, 11 գեներատոր, 5 տրանսֆորմատոր և շուրջ 27 հազար մետր էլեկտրական մալուխ։ Նշվում է, որ մատակարարված տեխնիկան կօգնի վերականգնել երկրի էներգետիկ համակարգը։

Լուրը հրապարակվել է այն ֆոնին, երբ հունվարի 20-ի գիշերը ռուսական ուժերը զանգվածային հարվածներ են հասցրել Ուկրաինայի օբյեկտներին՝ դրանք որակելով որպես պատասխան Ուկրաինայի զինված ուժերի կողմից քաղաքացիական ենթակառուցվածքների վրա իրականացված հարձակումներին։ Ավելի վաղ նաև հաղորդվել էր, որ Ադրբեջանի ղեկավարությունը համաձայնել է միանալ ԱՄՆ նախագահ Դոնալդ Թրամփի նախաձեռնած «Խաղաղության խորհրդին»՝ որպես կազմակերպության համահիմնադիր։