ԵՄ-ում խոսել են ԱՄՆ-ի դեմ պատասխան քայլերի հնարավորության մասին

Եվրամիությունը չպետք է սահմանափակի իրեն այն միջոցների կիրառման հարցում, որոնք կարող են անհրաժեշտ լինել համայնքի շահերը պաշտպանելու համար՝ ԱՄՆ-ի կողմից Գրենլանդիայի շուրջ հնչող հավակնությունների պայմաններում։ Այդ մասին հայտարարել է Եվրահանձնաժողովի փոխնախագահ, մրցակցության հարցերով պատասխանատու Թերեզա Ռիբերան՝ The Financial Times-ին տված մեկնաբանությունում։

Նրա խոսքով՝ Եվրամիությունը ունի «հնարավոր միջոցների ամբողջական փաթեթ» և չպետք է նախապես բացառի որևէ տարբերակ։ Ռիբերան, սակայն, չի հստակեցրել, թե կոնկրետ ինչ պատասխան քայլերի մասին է խոսքը՝ ընդգծելով, որ առաջնահերթությունը պետք է լինի լարվածության թուլացումը, բայց անհրաժեշտության դեպքում Բրյուսելը պետք է պատրաստ լինի նաև լրացուցիչ գործողությունների։

Հունվարի 17-ին ԱՄՆ նախագահ Դոնալդ Թրամփը հայտարարել էր մի շարք եվրոպական երկրների նկատմամբ մաքսատուրքերի սահմանման մասին՝ Գրենլանդիայի շուրջ իրավիճակի պատճառով։ 10 տոկոսանոց մաքսատուրքերը կկիրառվեն Դանիայի, Շվեդիայի, Ֆրանսիայի, Գերմանիայի, Նիդերլանդների և Ֆինլանդիայի, ինչպես նաև ԵՄ անդամ չհանդիսացող Մեծ Բրիտանիայի ու Նորվեգիայի նկատմամբ՝ ուժի մեջ մտնելով 2026 թվականի փետրվարի 1-ից։ Թրամփը նաև սպառնացել է հունիսի 1-ից այդ մաքսատուրքերը բարձրացնել մինչև 25 տոկոս։