Ֆոն դեր Լայենը հայտարարել է աշխարհում տիրող «անօրինականության» մասին

Եվրամիությունը պետք է արագացնի իր անկախացման գործընթացը՝ ինքն իրեն պաշտպանելու համար արագ փոփոխվող և անկայուն աշխարհում։ Այդ մասին հայտարարել է Եվրահանձնաժողովի նախագահ Ուրսուլա ֆոն դեր Լայենը՝ Reuters-ին տված մեկնաբանությունում՝ ընդգծելով, որ միջազգային համակարգում աճում է անօրինականության միտումը։

Նրա խոսքով՝ Եվրոպան շարունակում է նախընտրել երկխոսությունն ու քաղաքական լուծումները, սակայն պատրաստ է նաև վճռական քայլերի, եթե դրա անհրաժեշտությունը առաջանա։ Ֆոն դեր Լայենը նշել է, որ ԵՄ-ն պետք է հենվի սեփական ուժային լծակների վրա՝ ուժեղ տնտեսության, միասնական շուկայի, արդյունաբերական հիմքի, նորարարական և տեխնոլոգիական ներուժի, ինչպես նաև հասարակությունների համախմբվածության միջոցով՝ շեշտելով հատկապես ինքնապաշտպանության իրական կարողության կարևորությունը։

Եվրահանձնաժողովի ղեկավարը հավելել է, որ այս պայմաններում առավել քան երբևէ կարևոր է շարունակել ուշադրությունը Ուկրաինայի նկատմամբ՝ միաժամանակ համագործակցելով ԱՄՆ-ի և այլ գործընկերների հետ՝ Արկտիկայում անվտանգության ամրապնդման ուղղությամբ։ Ավելի վաղ ԵՄ մրցակցության հարցերով փոխնախագահ Թերեզա Ռիբերան նույնպես հայտարարել էր, որ միությունը չպետք է սահմանափակի իրեն այն միջոցների հարցում, որոնք անհրաժեշտ են համայնքի շահերը պաշտպանելու համար։