ԱՄՆ-ում հանգիստ են վերաբերվել Դանիայի՝ ամերիկյան պարտատոմսերից հրաժարվելու որոշմանը

Դանիական AkademikerPension կենսաթոշակային ֆոնդը մտադիր է արդեն հունվարին վաճառել ԱՄՆ ֆինանսների նախարարության պետական պարտատոմսերի իր ամբողջ փաթեթը՝ մոտ 100 միլիոն դոլարի չափով։ Այդ մասին հայտնում է CBS News-ը՝ նշելով, որ ֆոնդը ծրագրում է միջոցները փոխարկել դոլարի և կարճաժամկետ պարտքային արժեթղթերի։ Ֆոնդի ներկայացուցիչները հայտարարել են, որ որոշումը պայմանավորված է ԱՄՆ կառավարության ֆինանսական վիճակի վերաբերյալ մտահոգություններով։

ԱՄՆ ֆինանսների նախարար Սքոթ Բեսենթը, որը ներկայում գտնվում է Դավոսի Համաշխարհային տնտեսական ֆորումում, հայտարարել է, որ դանիական ֆոնդի ծրագրերը իրեն «բոլորովին չեն անհանգստացնում»՝ հաշվի առնելով ներդրումների համեմատաբար փոքր ծավալը։ Bloomberg-ը հիշեցնում է, որ ավելի վաղ Բեսենթը «սխալ պնդում» էր անվանել այն տեսակետը, թե եվրոպական երկրները կարող են զանգվածաբար սկսել վաճառել ԱՄՆ պարտատոմսերը՝ ի պատասխան Սպիտակ տան քայլերի Գրենլանդիայի շուրջ, և այդպիսով լուրջ ցնցում առաջացնել շուկաներում։

Միևնույն ժամանակ Deutsche Bank-ի վերլուծաբանները նշում են, որ եվրոպական երկրները, որոնք ընդհանուր առմամբ տիրապետում են շուրջ 8 տրիլիոն դոլարի ամերիկյան պարտատոմսերի և բաժնետոմսերի՝ գրեթե կրկնակի ավելին, քան աշխարհի մնացած մասը միասին, տեսականորեն կարող են քննարկել այդ միջոցների մի մասի վերադարձը Եվրոպա՝ կապիտալը դիտարկելով որպես ազդեցության գործիք։