ԱՄՆ-ում հազարավոր մարդիկ բողոքի ցույցեր են անցկացրել Թրամփի միգրացիոն քաղաքականության դեմ

ԱՄՆ-ի տարբեր քաղաքներում և համալսարանական ավաններում հազարավոր աշխատողներ ու ուսանողներ դուրս են եկել փողոցներ՝ բողոքելու նախագահ Դոնալդ Թրամփի միգրացիոն քաղաքականության դեմ։ Reuters-ի փոխանցմամբ՝ ցույցերը տեղի են ունեցել Թրամփի երկրորդ նախագահական ժամկետի մեկ տարվա լրացման օրը և ուղղված են եղել վարչակազմի կոշտ ներգաղթային սահմանափակումներին։

Բողոքի ակցիաներ են անցկացվել Վաշինգտոնում, Լոս Անջելեսում, ինչպես նաև ավելի փոքր քաղաքներում՝ այդ թվում Հյուսիսային Կարոլինայի Էշվիլում, որտեղ ցուցարարները երթ են անցկացրել քաղաքի կենտրոնով։ Ցույցերը ակտիվացել են վերջին շաբաթներին տեղի ունեցած միջադեպերից հետո, որոնք հասարակական լայն դժգոհություն են առաջացրել ներգաղթային ծառայությունների գործողությունների նկատմամբ։

Ուսանողական բողոքներ են տեղի ունեցել նաև Օհայոյի Քլիվլենդում և Նյու Մեքսիկոյի Սանտա Ֆեում, որտեղ դպրոցականները և ուսանողները մասնակցել են ներգաղթային ծառայությունների դեմ կազմակերպված հանրահավաքների։ Ակցիաները կազմակերպվել են ձախակողմյան շարժումների, արհմիությունների և քաղաքացիական կազմակերպությունների կողմից, իսկ ցույցերի ալիքը նախատեսվում է շարունակել ԱՄՆ արևմտյան քաղաքներում՝ այդ թվում Սան Ֆրանցիսկոյում և Սիեթլում։