Գործարար Նարեկ Նալբանդյանին պատկանող շինությունից 2 քաղաքացի են ընկել, մեկը՝ մահացել․ «Արմլուր»

ArmLur.am–ի տեղեկությունների համաձայն, հունվարի 20-ին Ծովազարդ գյուղի վարչական տարածքում Սևանա լճի ափին գտնվող կիսակառույց շինությունը, որտեղից 2 քաղաքացի վայր են ընկել, և նրանցից մեկը մահացել էր, պատկանում է իշխանությունների «սրտի» գործարար Նարեկ Նալբանդյանին։

Արդյոք շինհրապարակում պահպանվել են անվտանգության կանոնները և առհասարակ դեպքով կա քրեական վարույթ, թե ոչ։ Ի պատասխան՝ ՀՀ քննչական կոմիտեից հայտնեցին, որ․
«Դեպքի առթիվ նախաձեռնվել է քրեական վարույթ՝ Քրեական օրենսգրքի 355-րդ հոդվածի 2-րդ մասով՝ շինարարական, լեռնահանքային կամ այլ աշխատանքների կատարման ընթացքում աշխատանքի պաշտպանության կամ անվտանգության ապահովման կանոնները կամ պահանջները խախտելը, որն անզգուշությամբ առաջացրել է մարդու մահ»։
Ձերբակալված անձ չկա։

Հունվարի 20-ին ողբերգական դեպք է տեղի ունեցել Գեղարքունիքի մարզում։ Ծովազարդ գյուղի վարչական տարածքում՝ Սևանա լճի ափին գտնվող կիսակառույց շինության բակում, մահացած քաղաքացի էր հայտնաբերվել և 1 վիրավոր։ Ոստիկաններն ու պարեկները պարզել էին, որ մահացածը Երևանի բնակիչ 61-ամյա Արտուշ Գ.-ն է, իսկ վիրավորը՝ Կոտայքի մարզի բնակիչ 35-ամյա Մամիկոն Ա.-ն է։

Shamshyan.com-ի տեղեկություններով, նշված կիսակառույց շենքում կատարվում էին վերանորոգման աշխատանքներ, և նշված անձինք վերամբարձ կռունկի միջոցով պետք է գործողություններ կատարեին՝ տեղադրելով ապակիներ, սակայն մոտ 12 մետր բարձրության վրա աշխատանքներ կատարելու ժամանակ ճոպանը (տրոսը) կտրվել է, և նրանք վայր են ընկել։

Shamshyan.com-ի տվյալներով, նշված շինությունը պատկանում է Հայաստանում հայտնի գործարարներից մեկին։

Ի դեպ, «Հետք»-ը հրապարակել էր, որ իշխանափոխությունից հետո հայտնի դարձած գործարար Նարեկ Նալբանդյանը շուկայականից բազմապատիկ էժան գնով տիրացել է գործարար Փայլակ Հայրապետյանի գույքին։ Կասկածելի գործարքներով խնդրահարույց գույքը ձեռք բերած գործարար Նարեկ Նալբանդյանը դարձել է քրեական գործով անցնող ևս մեկ խոշոր գույքի սեփականատեր։

«Հետքը» պարզել է, որ Նարեկ Նալբանդյանը ձեռք է բերել Սևանի «Հայրապետ» հյուրանոցային համալիրն ու հարևանությամբ գտնվող երկու այլ գույք։ 2021 թ.-ին տեղի ունեցած գործարքի մանրամասներից հայտնի է դառնում, որ 6 միլիոն դոլար գնահատված հյուրանոցը գործարարը ձեռք է բերել 18 անգամ ցածր գնով՝ 360 հազար դոլարով։ Այս ամենը տեղի է ունեցել քրեական գործի առկայության պայմաններում։

Նարեկ Նալբանդյանը հանրությանը հայտնի դարձավ, երբ արտոնյալ պայմաններով ձեռք բերեց նախկին պաշտոնյայից պետությանը վերադարձված Ծաղկաձորի «Գոլդեն Փելիս» հյուրանոցը, իսկ գործարարի կինը գնեց վարչապետ Հովիկ Աբրահամյանի՝ քրեական գործով անցնող Մոնումենտի առանձնատունը։