«Պատերազմը զբոսանք չի». Իրաքի զինված խմբավորումը զգուշացնում է Իրանի դեմ հարվածների մասին

Իրաքի զինված խմբավորում՝ Kataib Hezbollah-ը հայտարարել է, որ Իրանի վրա ցանկացած հարձակման դեպքում տարածաշրջանը կարող է ներքաշվել «ամբողջական պատերազմի» մեջ` հայտարարելով, որ ռազմական աջակցություն կցուցաբերի Թեհրանին։ Խմբավորման ղեկավարը կիրակի ուշ երեկոյան հանդես է եկել կոշտ հայտարարությամբ՝ կոչ անելով իր մարտիկներին պատրաստ լինել պատերազմի և ընդգծելով, որ Իրանի դեմ պատերազմը «զբոսանք չի»։ Նրա խոսքով՝ Իրանը մուսուլմանական աշխարհի «բերդն ու հպարտությունն» է, իսկ դրա դեմ ուղղված գործողությունները նպատակ ունեն ենթարկեցնել և ոչնչացնել երկիրը։

Ալ-Համիդավին հայտարարել է, որ Իրանի դեմ հնարավոր ռազմական գործողության դեպքում «դիմադրության առանցքի» ուժերը պարտավոր են աջակցել Թեհրանին բոլոր հնարավոր միջոցներով։ Նա հիշեցրել է, որ նախորդ տարի, երբ ԱՄՆ-ն և Իսրայելը հարվածներ էին հասցրել Իրանին, տարածաշրջանային դաշնակիցները անմիջականորեն չէին միջամտել, սակայն նշել է, որ այս անգամ իրավիճակը կարող է այլ լինել։ 

Միևնույն ժամանակ, ԱՄՆ - Իրան լարվածությունը շարունակում է աճել։ ԱՄՆ պետքարտուղար Մարկո Ռուբիոն Իրաքի վարչապետ Մոհամմեդ Շիա ալ-Սուդանի հետ հեռախոսազրույցում Բաղդադին կոչ է արել հեռու մնալ Իրանից՝ ընդգծելով, որ Իրանի ազդեցության տակ գտնվող կառավարությունը չի կարող պաշտպանել Իրաքի շահերը։ Վաշինգտոնը տարածաշրջան է ուղարկել ավիակիր հարվածային խումբ, իսկ մի շարք ավիաընկերություններ արդեն կասեցրել են թռիչքները՝ հնարավոր էսկալացիայի պատճառով։ Թեհրանը հայտարարել է, որ դիվանագիտական ճանապարհով փորձում է խուսափել հակամարտությունից, սակայն իր զինված ուժերը «կոշտ պատասխան կտան» ինքնիշխանության ցանկացած խախտման դեպքում, հայտնում է Al-Jzeera-ն։